Posted: 03/29/2013 12:48 PM IST

చావు అనేది  ఏ రూపంలో  వస్తుందో ఎవరికి తెలియాదు.  అప్పటికి అందరితో హ్యాపీగా ఉన్న వ్యక్తి  సడన్ గా ఇద్దరు వ్యక్తులతో గొడవపడటంతో.. ఇప్పుడు అతను  మరణంతో పోరాటం చేస్తున్నారు.  నిత్యం వివాదాలతో సహవాసం చేసే న్యూజిలాండ్ క్రికెటర్ జెస్సీ రైడర్ మరోసారి గొడవలకు పోయి ప్రాణాలమీదికి తెచ్చుకున్నాడు. క్రైస్ట్‌చర్చ్‌లోని ఓ బార్ ఎదుట జరిగిన దాడిలో తీవ్రంగా గాయపడ్డ రైడర్ ఆస్పత్రిలో మృత్యువుతో పోరాడుతున్నాడు. తలకు తీవ్ర గాయమవడంతోపాటు ఊపిరితిత్తులు కూడా బాగా దెబ్బతిన్నాయి. శరీరంలో అంతర్గత గాయాలు ఎక్కువగా ఉండడంతో కోమాలోకి వెళ్లిపోయాడు. ఇంటెన్సివ్ కేర్‌లో చికిత్స పొందుతున్న రైడర్ పరిస్థితి విషమంగా ఉందని వైద్యులు తెలిపారు. ప్రస్తుతం అతని కుటుంబ సభ్యులంతా ఆస్పత్రిలో అతనితోనే ఉన్నారు.  జట్టు సభ్యులతోపాటు కొంతమంది మిత్రులతో కలిసి రైడర్ క్రైస్ట్‌చర్చ్‌లోని ఎక్‌మన్స్ బార్‌కు చేరుకున్నాడు. అయితే బార్ బయట ఫుట్‌పాత్‌పై ఇద్దరు వ్యక్తులతో జెస్సీ గొడవపడ్డా డు. ఆ తర్వాత ఎదురుగాఉన్న మెక్‌డొనాల్డ్స్‌లోకి వెళ్లేందుకు రోడ్డు దాటుతుండగా గొడవపడిన వ్యక్తులు వచ్చి రైడర్‌పై దాడి చేశారు.  వెంటనే అతణ్ని ఆస్పత్రికి తరలించారు. రైడర్‌కు శరీరంలో కనిపించని దెబ్బలు తగిలాయి. పరిస్థితి విషమంగా ఉండడంతో ఇంటెన్సివ్ కేర్‌లో ఉంచారు. దాడికి పాల్పడింది ఎవరనేది తెలియరాలేదని, అయితే ఎక్‌మన్ బార్, మెక్‌డొనాల్డ్స్‌లలో ఏర్పాటు చేసిన సీసీ కెమెరాల ఫుటేజీని పరిశీలిస్తున్నామని పోలీసులు చెప్పారు. ఏప్రిల్ 3 నుంచి జరగనున్న ఐపీఎల్ ఆరో అంచె పోటీల్లో లెఫ్టాండ్ డాషింగ్ బ్యాట్స్‌మెన్ రైడర్ ఢిల్లీ డేర్‌డెవిల్స్‌కు ప్రాతినిధ్యం వహించనున్నాడు. ఈ మెగా టోర్నీ కోసం శుక్రవారం అతడు భారత్‌కు బయల్దేరి రావాల్సి ఉంది.