Posted: 12/05/2012 02:43 PM IST

రాజకీయాలు దేశం పరువు తీస్తాయని మనం ఊహించి ఉండం. అధికారం కోసం, పదవుల కోసం ఏమైనా చేయడానికి వెనకాడరు రాజకీయ నాయకులు. అలాంటి నాయకుల వల్ల ఇప్పుడు భారత్ పరువు మంట గలిసింది. క్రీడా రంగంలో ఎంతో ప్రతిష్టాత్మకంగా భావించే ఒలంపిక్స్ లో భారత్ పాల్గొనే అవకాశాన్ని కోల్పోయింది. భారత్ పై వేటు వేయాల్సినంతగా చేసిన తప్పేంటి అంటే.... భారత ప్రభుత్వం రూపొందించిన ‘స్పోర్ట్స్ కోడ్ ’ ప్రకారం ఎన్నికలు నిర్వహించొద్దని, ఒలింపిక్ చార్టర్ ప్రకారమే జరపాలని ఐఓసీ చాలాసార్లు హెచ్చరించింది. ప్రభుత్వ నిబంధనల ప్రకారం ఎన్నికలు జరిపితే వాటి ఫలితాలను పరిగణనలోకి తీసుకోబోమని కూడా పలుమార్లు లేఖల ద్వారా తెలిపింది. అయినప్పటికీ ఈ అంశాన్ని పెద్దగా పట్టించుకోని ఐఓఏ ఢిల్లీ హైకోర్టు ఇచ్చిన ఆదేశాలకు తాము కట్టుబడి ఉండాల్సిందేనని స్పష్టం చేసింది. అదే రీతిలో స్పోర్ట్స్ కోడ్ ప్రకారం బుధవారం ఎన్నికలు నిర్వహించేందుకు అన్ని ఏర్పాట్లూ చేసింది. దీంతో ఆగ్రహించిన ఐఓసీ సస్పెన్షన్ వేటు వేసింది. భారత క్రీడా రంగానికి పెనుదెబ్బ అనే చెప్పవచ్చు. ఇలా పదవుల కోసం, కాసుల కోసం కక్కుర్తి  పడి ప్రభుత్వాలు నడిపే రాజకీయ నాయకులు భారత పరువు పోగొట్టవద్దని పలువురు క్రీడా కారులు కోరుతున్నారు. మరి ఇప్పుడు జరిగిన అవమానంతోనైనా ఇక పై సక్రమంగా నడుచుకుంటారో లేదో చూడాలి.