Posted: 08/27/2012 05:16 PM IST

19ఏళ్ల కుర్రాడంటే ఎలా ఉంటాడు...సరదాగా ఆడుతూ పాడుతూ, కొత్త ఫ్యాషన్‌లను అనుకరిస్తూనే అప్పుడప్పుడు కాస్త లెక్కలేని తనాన్ని ప్రదర్శిస్తూ ఒక రకమైన స్టైల్‌లో కనిపిస్తాడు. కానీ భారత జట్టును ప్రపంచకప్ విజేతగా నిలబెట్టిన ఉన్ముక్త్ చంద్ మాత్రం ఇందుకు పూర్తిగా భిన్నం. ఎంత మంచి ఆటగాడైనా ప్రవర్తనలో ఎక్కడా అనవసరపు దూకుడు ప్రదర్శించకుండా ప్రశాంతంగా కనిపిస్తాడు. ఈ వయసులో అతని ప్రియ నేస్తాలు ఏమిటో తెలుసా... చక్కటి పుస్తకాలు! చంద్‌కు పుస్తక పఠనం అంటే ఎంతో ప్రీతి. దానికి తోడు రెగ్యులర్‌గా డైరీ రాసే అలవాటు కూడా ఉంది. ‘నాతో పాటు ఎప్పుడూ డైరీ, డిక్షనరీ ఉంటాయి. కొత్త పదం ఏదైనా కనిపిస్తే వెంటనే రాసుకుంటాను. దానిని డిక్షనరీలో వెతికి ఆ తర్వాత మాట్లాడేటప్పుడు ఉపయోగించే ప్రయత్నం చేస్తాను’ అని ఈ ఢిల్లీ కుర్రాడు అంటాడు.

నిజంగానే అతను ఇప్పుడు ఇంటర్వ్యూల్లో మాట్లాడుతుంటే చాలా మంది వాటి అర్ధాల కోసం తడుముకోవాల్సి వస్తోంది. తన ఆటను స్వయంగా విశ్లేషించుకుంటూ డైరీల్లో రాసుకునే చంద్, ఒక పుస్తకాన్ని కూడా ప్రచురించాలని భావిస్తున్నాడు. స్కూల్‌లో ఉండగా బ్రెట్‌లీని ఎదుర్కొనే అవకాశం రావడం, అండర్-16 మ్యాచ్‌లో రనౌట్ కాకుండా ఎలా ఉండాల్సిందో ఇవన్నీ అతని డైరీలో కనిపిస్తాయి. పాఠశాల స్థాయిలో జాతీయ స్థాయి స్విమ్మర్‌గా గుర్తింపు తెచ్చుకున్న ఉన్ముక్త్ ప్రపంచకప్‌కు ముందు మూడు టోర్నీల్లో భారత్ అండర్-19 జట్టుకు కెప్టెన్‌గా వ్యవహరించాడు. అందులో రెండింటిలో మన టీమ్ టైటిల్ నెగ్గింది. ఇక ఇప్పుడు ఏకంగా వరల్డ్ కప్ వంతు. ఇంటర్ పాస్ అయిన రెండు రోజులకు అతనికి ఐపీఎల్‌లో ఢిల్లీ డేర్‌డెవిల్స్ తరఫున తొలి మ్యాచ్ ఆడే అవకాశం దక్కింది.ఉన్ముక్త్ తండ్రి భరత్ చంద్ ఠాకూర్ ఢిల్లీలోని ఆర్‌పీవీ విద్యాలయాలో ఎకనామిక్స్ టీచర్‌గా పని చేస్తున్నారు. ఉన్ముక్త్ స్వస్థలం ఉత్తరాఖండ్‌లోని పిథౌరాగఢ్. చంద్‌ను క్రికెటర్‌గా తీర్చి దిద్దడంలో అతని బాబాయ్ సుందర్ పాత్ర ఎంతో ఉంది. చంద్ ప్రస్తుతం ప్రతిష్టాత్మక సెయింట్ స్టీఫెన్స్ కళాశాలలో బీఏ చదువుతున్నాడు. గత మే నెలలో హాజరు శాతం తక్కువగా ఉందని కళాశాల పరీక్షలకు అనుమతించకపోవడంతో చంద్ కోర్టుకెక్కాడు. క్రీడాకారుల కోటాలో అడ్మిషన్ పొందిన ఉన్ముక్త్‌కు పరీక్షలు రాసే అవకాశం ఇవ్వాలని ఢిల్లీ హైకోర్టు ఆదేశించాల్సి వచ్చింది.