Posted: 12/23/2011 05:07 PM IST

ప్రపంచ ప్రఖ్యాత బ్యాటింగ్ దిగ్గజాలు డాన్ బ్రాడ్‌మన్, సచిన్ టెండూల్కర్‌లలో ఎవరు గొప్ప?.. అభిమానుల నుంచి క్రీడా పండితుల వరకు తరచూ వినిపించే ప్రశ్న! కొందరు బ్రాడ్‌మన్ గొప్పంటే.. మరికొందరు మాస్టరే అంటుంటారు. తాజాగా ఆస్ట్రేలియాకు చెందిన ఓ ఆర్థిక రంగ పరిశోధకుడు.. బ్రాడ్‌మన్ కంటే సచినే గొప్ప టెస్టు బ్యాట్స్‌మన్ అని తేల్చేశాడు.గ్రిఫిత్ యూనివర్సిటీ రీసెర్చర్ నికోలస్ రోడ్ అర్థిక సిద్ధాంతాన్ని అన్వయించి వేర్వేరు తరాలకు చెందిన ఈ దిగ్గజ బ్యాట్స్‌మెన్ ఆటతీరును బేరీజు వేశాడు. వీరిద్దరి కెరీర్‌లోని గణాంకాలను పరిగణనలోకి తీసుకుని ర్యాంక్‌లను కేటాయించినట్టు నికోలస్ చెప్పాడు. దీని ప్రకారం బ్రాడ్‌మన్ కంటే సచిన్ గొప్ప ఆటగాడని నికోలస్ చెబుతున్నాడు. ఇక నికోలస్ రూపొందించిన టాప్-10 జాబితాలో రాహుల్ ద్రావిడ్‌కు నాలుగు, గవాస్కర్‌కు ఎనిమిది ర్యాంక్‌లు దక్కాయి.సచిన్ కాదు ఇంజమామ్: బ్రాడ్‌మన్ ఓ సందర్భంలో మాట్లాడుతూ.. సచిన్ ఆటతీరు తన బ్యాటింగ్‌కు శైలికి దగ్గరగా ఉంటుందని చెప్పిన సంగతి తెలిసిందే. కాగా ఇంగ్లండ్ మాజీ క్రికెటర్ టోనీ షిల్లింగ్లా ఈ వాదనతో విభేదిస్తున్నాడు. ఓ విశ్లేషణ ప్రకారం వీరిద్దరి ఆటతీరు విభిన్నంగా ఉంటుందని చెప్పాడు. బయోమెకానికల్ పద్ధతి ప్రకారం ఇంజమామ్ ఉల్ హక్ (పాకిస్తాన్) ఆటతీరు బ్రాడ్‌మన్ శైలికి దగ్గరగా ఉంటుందని షిల్లింగ్లా పేర్కొన్నాడు.