ముక్కు పిండుతూ, జైల్లో పెట్టిస్తా- కెసిఆర్ హెచ్చరిక

Posted: 04/19/2014 08:52 AM IST

అధికారం రాగానే చంద్రబాబు నాయుడుని, వెంకయ్య నాయుడు అల్లుడిని ముక్కు పిండుతా, జైల్లో పెట్టిస్తా నంటూ గజ్వేల్ లో తెలంగాణా రాష్ట్ర సమితి అధ్యక్షుడు కె చంద్రశేఖరరావు హెచ్చరించారు.  భూదాన భూములను కబ్జా చేసిన చంద్రబాబు నాయుడు, వెంకయ్య నాయుడు అల్లుడికి ఆ సంగతి తెలుసుకాబట్టే తెరాసను తెలంగాణాలో అధికారంలోకి రాకుండా చేద్దామని చూస్తున్నారని అన్నారు. 

అందుకే పార్టీల పొత్తులు పెట్టుకుని భయానకమైన కుట్ర చేస్తున్నారని కెసిఆర్ అన్నారు.

భూదాన ఉద్యమంలో హైద్రాబాద్ శివార్లలో సేకరించిన లక్షలాది ఎకరాల భూమిలో తెదేపా హయాంలో 1.14 లక్షల ఎకరాల భూమిని చంద్రబాబు, వెంకయ్య నాయుడు అల్లుడు ఆక్రమించారని తెరాస అధికారంలోకి రాగానే వాటన్నిటిమీదా విచారణ జరిపించి వాళ్ళ ముక్కలు పిండి వాళ్ళని జైల్లో పెట్టి వసూలు చేస్తామని కెసిఆర్ అన్నారు.

తెలంగాణా ఏర్పాటును కోరుకున్నదే నీళ్ళు, నిధులు, నియామకాలు అనే అంశాల ప్రాతిపదిక మీద.  కానీ అదింకా పూర్తి కాలేదని, ఆంధ్రోళ్ళతో పంచాయితీ ఇంకా తెగలేదని అన్న కెసిఆర్ సామంత పాలన కావాలో స్వతంత్ర పాలన కావాలో తేల్చుకోండని గుడ్డిగా వోటేస్తే దెబ్బతింటామని హెచ్చరించారు.

-శ్రీజ