మాజీ మంత్రికి అడ్డదారిలో భార్య తోడు!

Posted: 04/18/2014 09:35 AM IST

వైయస్ ఆర్ కాంగ్రెస్ పార్టీ తరఫున మచిలీపట్నం లోక్ సభకు పోటీచేస్తున్న మాజీ మంత్రి పార్థసారధికి ఆయన భార్య కమల తోడు నీడగా పనిచేస్తూ పట్టుబడ్డ వైనం ఇది-
హైద్రాబాద్ నుంచి విజయవాడ బస్ లో ప్రయాణం చేస్తున్న కమల బ్యాగ్ లో 45 లక్షల రూపాయలు పోలీసులకు దొరికాయి.  అది కూడా హైద్రాబాద్ దాటక ముందే.  వనస్థలిపురం దగ్గర పోలీసు తనిఖీలో ఈ డబ్బు పోలీసులకు చిక్కింది. 

సాదారణంగా ఎన్నికల సమయంలో కార్లలో తనిఖీలుంటాయని అనుకుంటారు కాబట్టి బస్సులు, రైళ్ళలో ప్రయాణం చేస్తే ఎవరికీ తెలియదని, సురక్షితమని భావిస్తారు.  కానీ మంత్రుల కుటుంబ సభ్యుల రాకపోకలు, పెద్ద పెద్ద బ్యాగ్ లలో డబ్బును పెట్టుకోవటం, వాటిని మోస్తున్నవాళ్ళు కూడా పసిగట్టటం జరుగుతుంది. 

అంత డబ్బు విజయవాడ ఎందుకు తీసుకునిపోతున్నారన్నది చెప్పలేక పోవటంతో అది వోటర్లను ప్రలోభపెట్టటానికి ఉపయోగించే ఉద్దేశ్యంతోనే తీసుకునిపోతున్నారని భావించిన పోలీసులు ఆమెను, ఆమెతో పాటు సహాయంగా ప్రయాణం చేస్తున్న వ్యక్తిని అదుపులోకి తీసుకున్నారు. 

వ్యక్తిగత పూచీకత్తు మీద కమలను పోలీసులు విడుదల చేసారు. 

-శ్రీజ