అందరివాడైన కేజ్రీవాల్

Posted: 01/27/2014 10:52 AM IST

గణతంత్ర దిన సందర్భంగా రాష్ట్రపతి ప్రణబ్ ముఖర్జీ రాష్ట్రపతి భవన్ లో తన నివాసంలో నిర్వహించిన ఎట్ హోం కార్యక్రమానికి ఎందరో ప్రముఖులు హాజరయ్యారు. అయితే అందులో సాధారణ దుస్తులలో హాజరైన ఆమ్ ఆద్మీ పార్టీ నిర్వాహకుడు అరవింద్ కేజ్రీవాల్ విశేషాకర్షణగా నిలవటం విశేషం.  అక్కడకు విచ్చేసినవారిలో చాలామంది కేజ్రీవాల్ ని కలిసి ఆయనతో మాట్లాడి ఆయనతో కరచాలనం చెయ్యటానికి ఆత్రుత చూపించారు.  అందులో చాలా మంది ఆయన ఆటోగ్రాఫ్ కోసం ఎగబడ్డారు.  దీనితో కేజ్రీవాల్ మీద క్రేజ్ ఏ స్థాయిలో పెరిగిపోయిందన్నది అర్థమౌతోంది.  

సామాన్య ప్రజలకోసం పనిచేసే పార్టీగా ఆవిర్భవించిన ఆమ్ ఆద్మీ పార్టీ ని స్థాపించి ఢిల్లీ గద్దెను అధిరోహించిన కేజ్రీవాల్ సామాన్య ప్రజానీకంతో పాటుగా అధికారుల దృష్టిలో కూడా హీరో అయ్యారని ఈ సన్నివేశం తెలియజేస్తోంది.

కాకపోతే పెరుగుతున్న ఆదరణ వైరి వర్గాలలో అలజడి కూడా సృష్టిస్తుందని అదే రోజు పంజాబ్ లో జరిగిన గణతంత్ర ఉత్సవాలలో నిరూపితమైంది.  అక్కడ హాజరైన ఆమ్ ఆద్మీ పార్టీ కార్యకర్తలను కొన్ని బృందాలు దాడిచేసి అక్కడినుండి తరిమికొట్టాయి.  ఆ పార్టీ నేత అశోక్ తల్వార్ మాట్లాడుతూ పథకం ప్రకారమే కార్యకర్తల మీద దాడి జరిగిందని అన్నారు.

హిందూ క్రాంతి కారి సేనగా ప్రకటించుకున్న ఆ అల్లరి బృందం అమృత్ సర్ లో రాంబాగ్ గార్డెన్ లో జరిగిన గణతంత్ర వేడుకలకు హాజరైన కార్యకర్తల మీద కర్రలతో దాడి చేసి అక్కడి నుండి తరిమికొట్టారు.  

-శ్రీజ