వేసవిలో కొత్తిమీర తప్పనిసరి.. లేకపోతే!

Posted: 05/12/2015 01:04 PM IST

వేసవికాలంలో సూర్యతాపం అధికంగా వుండటంతో రకరకాల వ్యాధులు సంక్రమించే అవకాశాలు వుంటాయి. ముఖ్యంగా శరీరంలో వ్యాధినిరోధక శక్తి లోపిస్తుంది. అందుకే.. అధికంగా నీరు తీసుకోవడంతోపాటు ఆరోగ్యకరమైన ఆహారం సేవించాలని ఆరోగ్య నిపుణులు సలహాలు ఇస్తున్నారు. వేసవిలో ఆయిల్, జంక్ ఫుడ్స్ వంటివి తినడం పూర్తిగా తగ్గిస్తే చాలామంచిదని వారంటున్నారు. అలా చేస్తే.. జీర్ణ సమస్యల నుంచి ఉపశమనం లభిస్తుందని వారు చెబుతున్నారు. అలాగే వేసవిలో సాధ్యమైనంత వరకు కారం (స్పైసీ ఫుడ్స్) తినడం తగ్గించాలి. అలాకాకుండా ఆయిల్స్, జంక్, కారంగా వున్న ఫుడ్స్ తీసుకుంటే.. ఎన్నోసమస్యలను ఎదుర్కోవాల్సి వస్తుందని వారంటున్నారు. అందుకే వాటిని పూర్తిగా తగ్గిస్తే మంచిది.

ఇకపోతే.. వేసవి కాలంలో తీసుకునే ఆరోగ్యకరమైన డైట్‌లో కొత్తిమీర, సోంపు, అల్లం వంటి వాటిని తప్పనిసరిగా చేర్చుకుంటే ఆరోగ్యంగా వుండవచ్చునని నిపుణులు చెబుతున్నారు. ఎందుకంటే.. ఇవి జీర్ణవ్యవస్థను, జీర్ణక్రియలను మెరుగుపరుస్తాయి. ముఖ్యంగా కొత్తిమీర ఖచ్చితంగా రెగ్యులర్ డైట్ లో చేర్చుకోవాలని వైద్యులు సలహా ఇస్తున్నారు. ఇందులో వుండే పోషక విలువలు జీర్ణవ్యవస్థను మెరుగుపర్చడంలో సమర్థవంతంగా పనిచేస్తాయని, కడుపు సంబంధిత సమస్యల నుంచి దూరంగా వుంచుతాయని వారు తెలుపుతున్నారు. జీర్ణవ్యవస్థ హెల్తీగా ఉండాలంటే, వేసవిలో సాధ్యమైనంత వరకూ పెరుగు, మజ్జిగ, లస్సీ వంటి చల్లని పదార్థాలు తీసుకోవడం వల్ల జీర్ణ సమస్యను నివారించుకోవచ్చు. వీటిల్లో కూడా కొత్తిమీర చేర్చుకుంటే చాలా మంచిది.

అలాగే రెగ్యులర్‌గా తీసుకొనే ప్రోటీన్ ఫుడ్స్ వేసవిలో మితంగా తీసుకుంటే ఎంతో శ్రేయస్కరం. ఒకేసారి కాకుండా రోజులో మూడు నాలుగు సార్లు తీసుకోవడం వల్ల ఆకలి అరికడుతుందని ఆరోగ్య నిపుణులు అంటున్నారు. పోషకాలు అధికంగా నిల్వవుండే ఆహారాలు ప్రతిరోజూ తీసుకుంటే ఎటువంటి సమస్యలు దరికి చేరవని వారు వెల్లడిస్తున్నారు. కాబట్టి.. పోషకాహారం తీసుకోండి.. ఆరోగ్యంగా వుండండని సూచిస్తున్నారు.