వేసవిలో తీసుకోవాల్సిన పోషకాహారాలు..

Posted: 04/14/2015 08:31 PM IST

వేసవికాలం వచ్చిందంటే చాలు.. సూర్యతాపం వల్ల రకరకాల రోగాలు వచ్చే అవకాశాలున్నాయని ఆరోగ్య నిపుణులు పేర్కొంటున్నారు. ముఖ్యంగా శరీరంలో వేడిశాతం పెరుగుతుందని, తద్వారా ఆకలి ఎక్కువ కాకపోవడం సమస్య అధికమవుతుందని అంటున్నారు. అలా భోజనం చేయకపోవడంతో శరీరంలో పోషక విలువలు తగ్గి నీరసించిపోతారు. కాబట్టి.. ఇటువంటి పరిస్థితి రాకుండా వుండాలంటే.. కొన్ని పోషకాహారాలు తీసుకుంటే ఆరోగ్యంగా వుండవచ్చునని వారు సలహా ఇస్తున్నారు.

వేసవికాలంలో శరీరంలోని వేడి తగ్గించాలంటే.. ఎక్కువగా నీటిని తాగాలి. సాధారణంగా తీసుకొనే స్థాయి కంటే వేసవిలో మరింత ఎక్కువగా నీటిని తీసుకోవాలని వారు సూచిస్తున్నారు. అలాగే సిట్రస్, ఆరెంజ్ లాంటి పండ్లు తీసుకుంటే చాలా మంచిది. ఎందుకంటే.. వాటిల్లో శరీరానికి అవసరమయ్యే ‘విటమిన్ సి’తోపాటు వాటర్ కంటెంట్ అధిక మోతాదులో వుంటుంది. ఇకపోతే.. ఒక గ్లాసు చల్లటి పాలలో ఒకటి లేదా రెండు చుక్కల బాదం ఆయిల్, బాదం పౌడర్ కూడా మిక్స్ చేసి తీసుకోవచ్చు. ఇక వెజిటేరియన్ ఫుడ్స్‌లో వాటర్ కంటెంట్ అధికంగా ఉండటం వల్ల వీటికి ఎక్కువగా ప్రాధాన్యత ఇవ్వాలి. అంతేకాదు మాంసాహారాలతో పోల్చితే వెజిటేరియన్ ఫుడ్స్‌లో విటమిన్స్ కూడా అధికంగా ఉంటాయని ఆరోగ్య నిపుణులు అంటున్నారు.

వేసవిలో బాడీ హీట్‌ను తగ్గించే మరో ఉత్తమ హోం రెమెడీ పెరుగు అన్నం. ఈ ఆహారాన్ని తినే ముందు కొద్దిగా నీళ్ళు మిక్స్ చేస్తే ఫలితం మరింత ఎక్కువగా ఉంటుంది. వెన్న తీసిన మజ్జిగను ప్రతిరోజూ త్రాగడం వల్ల వేసవి తాపం తీర్చడంతోపాటు శరీరంలో వేడి మటుమాయం అవుతుంది. ఈ నియమాలను పాటిస్తే.. శరీరంలో వేడి శాతాన్ని తగ్గించుకొని నిత్యం ఆరోగ్యంగా వుండవచ్చునని ఆరోగ్య నిపుణులు వెల్లడిస్తున్నారు.