ఆరేంజ్ జ్యూస్ తాగుతున్నారా..? అయితే జాగ్రత్త!

Posted: 03/09/2015 04:20 PM IST

సాధారణంగా ఫ్రూట్స్ లో ఆరోగ్యానికి మేలు చేసే ఎన్నో విటమిన్లు, ఇతర పోషకాలు అధిక మోతాదులో నిల్వవుంటాయి. అందుకే.. వాటిని తినడం లేదా జ్యూస్ గా చేసుకుని తాగడం మంచిదని ఆరోగ్య నిపుణులు కూడా సలహాలు ఇస్తున్నారు. అంతెందుకు.. జ్వరం లేదా ఇతర చిరుజబ్బులు వచ్చినప్పుడు ఫ్రూట్స్ ఎక్కువ వాడాల్సిందిగా వైద్యులు కూడా సూచిస్తారు. అటు ఆరోగ్యపరంగా మేలు చేయడంతోపాటు తాగడానికి రుచికరంగా వుంటాయి కాబట్టి.. ప్రతిఒక్కరూ పళ్లరసాలు తాగేందుకు ఎక్కువ ఆసక్తి చూపుతారు. అలాగని ప్రతిరోజూ పళ్లరసాలు తాగితే మాత్రం ప్రమాదమే!

రోజూ తియ్యటి పళ్లరసాలు తాగితే ఎన్నో ఆరోగ్య సమస్యలు ఎదుర్కోవాల్సి వస్తుందని ఆరోగ్య నిపుణులు హెచ్చరిస్తున్నారు. ఫ్రూట్ జ్యూస్ రోజూ తాగేవాళ్లలో రక్తపీడనం బాగా పెరుగుతుందని వాళ్లు చెబుతున్నారు. దాంతో హార్ట్ ఎటాక్ రిస్క్ లేదా యాంజినా (ఛాతి నొప్పి) ఏర్పడే ప్రమాదం వుందని నిపుణులు పేర్కొంటున్నారు. నిజానికి పళ్ల రసాల్లో అవసరమైన విటమిన్లు ఉన్నమాట వాస్తవమే కానీ వాటితోపాటు అధిక మొత్తంలో చక్కెర కూడా ఉంటుందనే విషయాన్ని మరిచిపోకూడదని వాళ్లు వెల్లడిస్తున్నారు. ముఖ్యంగా ఆరేంజ్ జ్యూస్ లో అయితే చక్కెరశాతం ఊహించిన దానికంటే ఎక్కువ మోతాదులో వుంటుందని నిపుణులు తమ పరిశోధనల ద్వారా స్పష్టం చేస్తున్నారు.

ఆరోగ్య నిపుణులు నిర్వహించిన పరిశోధనల్లో... ఆరేంజ్ జ్యూస్, స్వీటెన్డ్ డ్రింక్‌లంత హానికరం అని తేలింది. 250 మిల్లీలీటర్ల ఆరేంజ్ జ్యూస్ లో 115 కాలరీలు లేదా ఏడు టీ స్పూన్ల చక్కెర ఉంటుంది. కానీ.. ప్రపంచ ఆరోగ్య సంస్థ లెక్క ప్రకారం రోజుకి ఆరు స్పూన్ల చక్కెర మాత్రమే వాడాలి. అందుచేత ఆరెంజ్ జ్యూస్‌ను పంచదార కలపకుండా తాగాలి. లేకుంటే ఆరెంజ్ జ్యూస్‌లో కాస్త నీటి మోతాదు పెంచాలి. రోజూ కాకుండా వారానికి రెండు సార్లు లేదా మూడు సార్లు ఆరెంజ్ జ్యూస్ తీసుకోవచ్చు. అలాగే తక్కువ మోతాదులో తీసుకుంటే ఇంకా మంచిది.