రై.. రై అంటూ ధోనిని దాటేసిన రైనా..

Posted: 03/13/2018 07:39 PM IST

భారత జట్టులోకి రీ ఎంట్రీ ఇచ్చిన క్రికెటర్ సురేష్ రైనా అటు తన ఖాతాలో పలు ఘనతను నమోదు చేసుకుంటూనే ఇటు తన సహచరులను కూడా అధిగమించి వెళ్తున్నాడు. దక్షిణాఫ్రికాతో జరిగిన టీ20 సిరీస్ లో తనదైన ప్రదర్శన కనబర్చడంతో ముక్కోణపు టోర్నీకి ఆయనను ఎంపిక చేసిన సెలక్టర్ల అంచనాలను తక్కువ కానీయకుండా తన బ్యాటుతో మంత్రజాలం విసురుతున్నాడు.

తాజాగా రైనా.. టీమిండియా మాజీ కెపె్టన్ ధోనీని దాటేశాడు. అంతర్జాతీయ టీ20 క్రికెట్లో భారత్‌ తరఫున అత్యధిక పరుగులు సాధించిన ఆటగాళ్ల జాబితాలో రైనా.. ధోనీని వెనక్కి నెట్టి మూడో స్థానంలో నిలిచాడు. ముక్కోణపు టోర్నీలో భాగంగా శ్రీలంకతో జరిగిన టీ20 మ్యాచ్‌ లో రూనా 27 పరుగులు సాధించి.. ఈ ఘనతను నమోదు చేసుకున్నాడు. దీంతో రైనా పరుగుల సంఖ్య 1,452కి చేరింది. ధోనీ 1,444పరుగులతో ఆ తర్వాతి స్థానంలో కొనసాగుతున్నాడు. ఇలా ధోనిని సురేష్ రైనా అధిగమించాడు. మరో 48 పరుగులు చేస్తే రైనా 1,500 పరుగుల క్లబ్‌లో చేరతాడు.

కాగా, విరాట్‌ కోహ్లీ(1,983), రోహిత్‌ శర్మ(1,696) అగ్రస్థానాల్లో కొనసాగుతున్నారు. ముక్కోణపు టోర్నీలో భాగంగా భారత్‌ బుధవారం బంగ్లాదేశ్ తో తలపడనుంది. మూడు మ్యాచుల్లో రెండు గెలిచిన భారత్‌ పాయింట్ల పట్టికలో ప్రస్తుతం అగ్రస్థానంలో కొనసాగుతోంది. ఇధిలావుండగా, ఈ ఏడాది జరిగే ఐపీఎల్ లో ధోనీ, రైనా చెన్నై సూపర్ కింగ్స్ కు ప్రాతినిథ్యం వహించనున్న సంగతి తెలిసిందే. టీమిండియా త్వరలో విదేశీ పర్యటనలకు వెళ్లనున్న నేపథ్యంలో కోహ్లీ, ధోనీతో పాటు పలువురు ఆటగాళ్లకు బీసీసీఐ ముక్కోణపు టోర్నీ నుంచి విశ్రాంతి కల్పించింది.