నేను రె‘ఢీ’.. మీరు రెడీయేనా.?: లంక అల్ రౌండర్

Posted: 12/15/2017 08:45 PM IST

విశాఖపట్నం వేదికగా టీమిండియాతో జరుగుతున్న వన్డే సిరీస్ లో నిర్ణయాత్మక మూడో వన్డే తాను రెడీ అని మరీ మీరు రెడీనా అన్నట్లుగా సంకేతాలు పంపాడు శ్రీలంక స్టార్‌ ఆల్‌రౌండర్‌ ఏంజెలో మాథ్యూస్‌. ఈ మేరకు ఆ జట్టు మేనేజర్‌ అసంక గురుసిన్హ వెల్లడించారు. మొహాలిలో జరిగిన రెండో వన్డేలో శతకం బాదిన మాథ్యూస్ గాయపడిన విషయం తెలిసిందే. అయితే గత రెండు రోజులుగా విశ్రాంతి తీసుకున్న అతను కోలుకుని పూర్తి ఫిట్ నెస్ తో ఉన్నాడని చెప్పారు. విశాఖ మైదానంలో బ్యాటింగ్‌, బౌలింగ్ సాధన చేశాడని తెలిపారు. మొత్తం 15 మంది ఆటగాళ్లు ఎంపికకు అందుబాటులో ఉన్నారని వెల్లడించారు.

ధర్మశాల వన్డేలో చతికిలబడిన టీమిండియా.. మొహాలిలో మాత్రం లంకను చిత్తు చేసింది. రోహిత్ శర్మ డబుల్ సెంచరీని నమోదు చేయగా, శిఖర్ ధావన్, కొత్త కుర్రాడు శ్రీయస్ అయ్యార్ బాగా రాణించడంతో ఏకంగా 392 పరుగులు సాధించిన విషయం తెలిసిందే. రెండో వన్డేలో శ్రీలంకపై 141 పరుగుల తేడాతో విజయం సాధించిన టీమిండియా ఇక మూడో వన్డే కోసం ఇప్పటికే విశాఖకు చేరుకుంది. ప్రస్తుతం రెండు జట్టు 1-1తో సమంగా వుండటంతో మూడో వన్డే నిర్ణయాత్మకంగా మారింది. ఆదివారం మధ్యాహ్నం 1:30 గంటలకు జరగనున్న ఈ మ్యాచులో గెలిస్తే టీమిండియా.. ఐసీసీ ర్యాంకింగ్స్ లో తన స్థానాన్ని పధిలం చేసుకోనుంది.