పెళ్లిబాజాలు.. ఒక్కటవ్వనున్న వార్తలన్నీ కల్పితమే

Posted: 10/24/2017 06:22 PM IST

టీమిండియా సారథి విరాట్ కోహ్లీ, బాలీవుడ్ నటి అనుష్క శర్మలు గాఢ ప్రేమికులన్న విషయం యావత్ ప్రపంచానికి తెలిసిందే. అయితే గత నాలుగేళ్లుగా ప్రేమించుకుంటున్న వీరిద్దరూ ఇక ఒక్కటి కాబోతున్నారన్న వార్త అభిమానుల్లో కొత్త అశలను రేపింది. డిసెంబరులో వీరిద్దరి వివాహం అంగరంగ వైభవంగా జరగనుందని కూడా వార్తలు వచ్చాయి. అయితే అవన్నీ కేవలం కల్పితమేనని చివరాఖరున తేలిపోయింది. అదేంటి పెళ్లి చేసుకోవాల్సిన జంట వార్తలు కల్పితమని చెప్పడమేంటని అంటారా..?

అసలు విరాట్ అనుష్కలు ఒక్కటవుతున్నారన్న వార్త తెరపైకి రావడానికి కారణమం శ్రీలంకతో డిసెంబర్ మాసంలో జరుగుతున్న సిరీసే కావడం గమనార్హం. శ్రీలంకతో టెస్ట్, వన్డే సిరీస్ లకు తనకు విశ్రాంతి కల్పించాలని బిసీసీఐని కోరిన విరాట్ అందుకు తన వ్యక్తిగత కారణాలను ఉదహరించాడట. దీంతో కోహ్లీ లంకతో సిరీస్‌కు అందుబాటులో ఉండటం లేదన్న వార్తను మీడియా మిత్రులు తమకు అనుగూణంగా రాసేసుకున్నారు. అంతే ఒక్కసారిగీ ఈ వార్త కాస్తా వైరల్ అయ్యింది.

ఈ విషయమై స్పష్టతను తెలుసుకునేందుకు బాలీవుడ్ నటి అనుష్క శర్మ డేట్స్ ను డీల్ చేస్తున్న ఓ ఏజెన్సీని జాతీయ మీడియా వివరణ కోరగా, అ వార్తలన్నీ కల్పితమేనని చెప్పుకోచ్చింది. తమకు ఈ విషయమై ఎలాంటి సమాచారం లేదని చెప్పింది. ఇక ఇటు కోహ్లీకి సంబంధించి వివరణ ఇచ్చిన మాజీ కెప్టెన్ ధోని విరాట్ అన్ని టెస్టులకు అందుబాటులో వుంటాడని కూడా స్పష్టతను ఇచ్చాడు. దీంతో వచ్చిన వార్తలన్నీ కేవలం ఊహాగానాలనే తెలుసుకున్న అభిమానులు నిరాశకు గుర్యాయారు.