ధోని నుంచి ఎంతో స్ఫూర్తి పోందాను..

Posted: 06/15/2017 04:24 PM IST

ఛాంపియన్స్‌ ట్రోఫీని వరుసగా రెండోసారి కైవసం చేసుకోవాలని భావిస్తున్నట్లు భారత క్రికెట్‌ జట్టు సారథి విరాట్ కోహ్లీ తెలిపాడు. ప్రతీ మ్యాచ్ కూ తాము పూర్తిస్థాయిలో ప్రణాళిక సిద్ధం చేసుకుంటామని అన్నాడు. గత ఛాంపియన్స్ ట్రోఫీలో భారత జట్టును ధోనీ అద్భుతంగా ముందుకు నడిపించాడని, అతని నుంచి ఎంతో స్ఫూర్తి పొందానని కోహ్లీ చెప్పాడు. గతంలో ఎన్నోసార్లు కోహ్లీ... ధోనీపై ప్రశంసలు కురిపించిన విషయం తెలిసిందే. అతని సలహాలు వెలకట్టలేనివని, మ్యాచ్ లో అనుభవజ్ఞుల సూచనలు అవసరమని కోహ్లీ పలుమార్లు తెలిపాడు.

నాలుగేళ్ల క్రితం బర్మింగ్ హామ్ లోని ఎడ్జ్ బస్టన్ వేదికగా ‘భారత్‌-ఇంగ్లాండ్ మధ్య జరిగిన ఫైనల్లో భారత్ విజయం సాధించింది. ఇప్పుడు అదే మైదానంలో సెమీఫైనల్లో బంగ్లాదేశ్ తో తలపడుతున్నామని అన్నాడు. ప్రస్తుత టోర్నీలో లీగ్‌లో భాగంగా పాక్‌తో జరిగిన మ్యాచ్ లో ఇదే వేదికపై ఘన విజయం సాధించామని చెప్పాడు. ఇది తమకు కలిసొచ్చిన మైదానమని చెప్పుకోచ్చాడు విరాట్ కోహ్లీ.

లీగ్ దశలో పాకిస్తాన్‌, దక్షిణాఫ్రికా జట్లపై మంచి విజయాలు సాధించి సెమీస్ లో అడుగుపెట్టామని.. అయితే శ్రీలంకతో ఓటమి కొంత బాధ కలిగించింది. అయినప్పటికీ ఇప్పుడు పూర్తి ఆత్మ విశ్వాసంతో ఉన్నామని చెప్పాడు. ఎడ్జ్ బస్టన్ లో అద్భుతంగా రాణిస్తున్నామని.. ఈ పిచ్‌ తమ గేమ్‌కి అనుకూలిస్తోందని తెలిపాడు. అభిమానుల మద్దతు మరిచిపోలేనిదన్నాడు. మెరుగైన ప్రదర్శన ద్వారా తప్పకుండా ఫైనల్‌ చేరతామని భావిస్తున్నామని కోహ్లీ తెలిపాడు.