అశ్విన్ సాహా మద్య సెంచరీ భాగస్వామ్యం..

Posted: 08/10/2016 06:39 PM IST

నాలుగు టెస్టుల సిరీస్ లో భాగంగా వెస్టిండీస్ లో పర్యటిస్తున్న టీమిండియా మూడవ టెస్టులో రాణించేందుకు అపసోపాలు పడింది. అదిలోనే వికెట్లు కోల్పోయిన టీమిండియా పీకల్లోతు కష్టాలలో పడగా, ఆఫ్ స్పిన్నర్ రవిచంద్రన్ అశ్విన్ తన బ్యాటును ఝుళిపించాడు. వృద్దిమాన్ సహాతో కలసి ఏకంగా అజేయ సెంచరీ భాగస్వామ్యాన్ని నెలకొల్పాడు. దీంతో అశ్విన్ నిజంగా ఆల్ రౌండరని మరోమారు రుజువు చేసుకున్నాడు. వెస్టిండిస్ టూర్ లో బౌలింగ్ తోనే కాకుండా బ్యాటుతోనూ సత్తా చాటుతున్న అశ్విన్ తన కెరీర్ లోనే తొలి సెంచరీని నమోదు చేశాడు.

తాజాగా క్రితం రోజు ప్రారంభమైన మూడో టెస్టులో టాపార్డర్ వరుసగా పెవిలియన్ చేరినా, అశ్విన్ (75 నాటౌట్) మాత్రం నిలబడి జట్టును ఆదుకున్నాడు. అజింక్య రహానేతో కలసి బ్యాటింగ్ చేసిన అశ్విన్.. పరుగులను రాబట్టడంతో సక్సెస్ అయ్యాడు. కాగా టీ విరామానికి ముందు రహానే పెవీలియన్ మార్గం పట్టగా, ఆ తరువాత వచ్చిన సాహాతో కలసి సెంచరీ భాగస్వామ్యాన్ని నెలకొల్పాడు. ఫలితంగా తొలి రోజు ఆట ముగిసే సమయానికి కోహ్లీ సేన 5 వికెట్ల నష్టానికి 234 పరుగులు చేసింది. అశ్విన్, వృద్ధిమాన్ సాహా (46) క్రీజులో ఉన్నారు.

టాస్ గెలిచి ఫీల్డింగ్ ఎంచుకున్న ఆతిథ్య జట్టు వెస్టిండిస్... పర్యాటక జట్టు టీమిండియాను బ్యాటింగ్ కు ఆహ్వానించింది. తొలి రెండు టెస్టుల్లో ఓపెనర్లు మెరవడంతో భారీ స్కోరు సాధించిన టీమిండియా... మూడో  టెస్టులో మాత్రం విండీస్ బౌలర్లను ఎదుర్కోవడంలో ఇబ్బంది పడింది. ఫలితంగా 87 పరుగులకే నాలుగు వికెట్లను చేజార్చుకుంది. ఈ సమయంలో క్రీజులోకి వచ్చిన అశ్విన్ జట్టును ఆదుకున్నాడు. రెహానేతో కలిసి విండీస్ బౌలర్ల సహనానికి పరీక్ష పెట్టిన అశ్విన్.. రెహానే ఔటైన తర్వాత సాహాతో కలిసి జట్టు స్కోరును పరుగు పెట్టించాడు.