ఐపీఎల్ బెస్ట్ క్యురేటర్ గా చంద్రశేఖర్ హ్యాట్రిక్..

Posted: 05/31/2016 07:52 PM IST

హైదరాబాద్ క్రికెట్ సంఘం  (హెచ్‌సీఏ) క్యూరేటర్ వై.ఎల్.చంద్రశేఖర్ రావు వరుసగా మూడో ఏడాది ఐపీఎల్‌లో పురస్కారాన్ని దక్కించుకున్నారు.  మెదక్ జిల్లాకు చెందిన ఆయన ఐపీఎల్-9 సీజన్‌లో బెస్ట్ క్యూరేటర్ పురస్కారాన్ని సొంతం చేసుకున్నారు.  ఈ సందర్భంగా ఆయనకు రూ. 25 లక్షల పారితోషికంతోపాటు ప్రశంస పత్రాన్ని అందజేశారు. 2014లో బెస్ట్ క్యూరేటర్‌గా రూ. 12 లక్షల పారితోషికం అందుకున్న చంద్రశేఖర్... గతేడాది బెస్ట్ క్యూరేటర్‌గా రెండోసారి ఐపీఎల్ నిర్వాహకుల నుంచి రూ. 9 లక్షలను బహుమతిగా పొందారు.
 
ఈ ఏడాది నెల రోజులుగా క్రికెట్ అభిమానులను హోరెత్తించిన ఐపీఎల్ సీజన్ ముగియడంతో పిచ్‌ల తయారీలో నైపుణ్యాన్ని ప్రదర్శించిన చంద్రశేఖర్‌రావుకు నిర్వాహకులు మూడోసారి బెస్ట్ క్యూరేటర్‌గా అవార్డును ప్రకటించారు. ఉప్పల్ స్టేడియంలో విధులు నిర్వహించే చంద్రశేఖర్‌కు ఈ ఏడాది రూ. 25 లక్షల నజరానా లభించింది. చంద్ర శేఖర్‌రావు బెస్ట్ క్యూరేటర్‌గా అవార్డును పొందడం పట్ల సిద్ధిపేట క్రికెట్ అసోసియేషన్ ప్రతినిధులు రాజు, మహేష్, మల్లికార్జున్‌తో పాటు ఎస్‌పీఎల్ బృందం హర్షం వ్యక్తం చేసింది.

మనోహర్