బ్యాడ్మింటన్ లో నెంబర్ వన్ గా సిరిల్ వర్మ

Posted: 01/08/2016 04:28 PM IST

మన వాళ్లు స్పోర్ట్స్ లో దూసుకెళుతున్నారు. నిన్న సైనా నెహ్వాల్ బ్యాడ్మింటన్ లో టాప్ లోకి వెళితే నేడు అదే బాడ్మింటన్ లో జూనియర్ విభాగంలో మన క్రీడాకారుడు సిరిల్ వర్మ దూసుకెళ్లాడు. తాజాగా జూనియర్ విభాగంలో సిరిల్ వర్మ సింగిల్స్‌లో ప్రపంచ నంబర్‌వన్‌గా అవతరించి మరోసారి మన సత్తాను చాటాడు. హైదరాబాద్‌కు చెందిన ఈ యువ సంచలనం అండర్-19 విభాగం పురుషుల సింగిల్స్‌లో అగ్రస్థానాన్ని కైవసం చేసుకొని రికార్డు సృష్టించాడు. గతేడాది చివర్లో ప్రపంచ జూనియర్ చాంపియన్‌షిప్‌లో ఫైనలిస్టుగా నిలవడంతో సిరిల్ ఏకంగా 11స్థానాలను మెరుగుపరచుకున్నాడు. ఫలితంగా.. ప్రపంచ బ్యాడ్మింటన్ సమాఖ్య ప్రకటించిన తాజా ర్యాంకింగ్స్‌లో జూనియర్స్‌లో సిరిల్ నంబర్‌వన్‌గా నిలిచాడు. ఫ్రాన్స్‌కు చెందిన తోమా జూనియర్ పొపోవ్ రెండోర్యాంకులో నిలవగా, భారత్‌కే చెందిన చిరాగ్ సేన్ మూడోర్యాంకుతో టాప్‌త్రీలో చోటు దక్కించుకున్నాడు.

సిరిల్ గతేడాది నవంబర్‌లో పెరూ దేశంలో జరిగిన ప్రపంచ జూనియర్ చాంపియన్‌షిప్‌లో బాలుర సింగిల్స్‌లో రన్నరప్‌గా నిలిచాడు. దీంతో ఈ మెగా ఈవెంట్‌లో సింగిల్స్ రజతం నెగ్గిన తొలి భారత షట్లర్‌గా రికార్డు సృష్టించాడు. గతేడాదే ఆసియా జూనియర్ చాంపియన్‌షిప్‌లో స్వర్ణం నెగ్గి అందరి దృష్టిని ఆకర్షించిన సిరిల్..అదే ఏడాది ఆసియా యూత్ ఈవెంట్‌లో పతకం సాధించి తన సత్తాచాటుకున్నాడు. బీహెచ్‌ఈఎల్‌కు చెందిన సిరిల్ జాతీయ చీఫ్ కోచ్ పుల్లెల గోపీచంద్‌కు చెందిన అకాడమీలో శిక్షణ పొందుతున్నాడు. గత నాలుగేండ్లుగా జూనియర్‌స్థాయిలో అద్భుతంగా ఆకట్టుకుంటున్న సిరిల్‌కు ఒలింపిక్ గోల్డ్ క్వెస్ట్ సంస్థ సహకారం అందిస్తోంది.