చర్చలే ఆ సిరీస్ సమస్యను పరిష్కరిస్తాయి

Posted: 11/02/2015 07:17 PM IST

భారత్, పాకిస్తాన్ మధ్య క్రికెట్ సిరీస్ మునుపటి మాదిరిగానే కోనసాగాలంటే భారత్, పాకిస్థాన్ ప్రభుత్వాలు చర్చించాల్సిన అవసరం ఎంతైనా వుందని మాజీ భారత క్రికెట్ దిగ్గజం సునీల్ గవాస్కర్ అన్నాడు. రెండు దేశాల మధ్య డిసెంబర్ ‌- జనవరిలో జరగాల్సిన సిరీస్‌కు సంబంధించి బీసీసీఐ నుంచి స్పందన కోసం పిసిబి ఎదురు చూస్తోంది. అయితే, ప్రభుత్వం నుంచి అనుమతి కోరామని, పది రోజుల్లోగా సిరీస్ పైన జవాబిస్తామని బీసీసీఐ చెప్పింది. దీంతో సిరీస్‌ జరగడం ఇప్పటికీ సందిగ్ధంగానే ఉంది. ఈ నేపథ్యంలో రెండు దేశాల మధ్య అపనమ్మకాన్ని తొలగించాలని గవాస్కర్‌ అభిప్రాయపడ్డాడు. ఇస్లామాబాద్, ఢిల్లీ స్థాయిలో చర్చలు జరిగి అవి ఫలప్రదంగా ముగిస్తేనే ఈ సిరీస్ కొనసాగతుందని అభిప్రాయాన్ని వ్యక్తం చేశాడు.

ఏ సమస్యను పరిష్కరించుకోవాలన్నా ముందు సంప్రదింపులు ముఖ్యమని చెప్పాడు. మాట్లాడుకోనంత వరకు ఏ సమస్యకూ పరిష్కారం దొరకదన్నాడు. ఏ ఆటకూ ప్రభుత్వ అభిప్రాయాన్ని మార్చే శక్తి లేదని, అయితే రెండు దేశాలు పోటీ పడ్డప్పుడు, ఆయా దేశాల అభిమానులు వచ్చి మ్యాచ్‌లు చూసి, కలుపుగోలుగా ఉండి పరిస్థితులను అర్థం చేసుకుంటే.. ఆ పరిణామాలు ప్రభుత్వానికి ఓ సంకేతాన్నిస్తాయన్నాడు. నేను రాజకీయ నాయకుణ్ని కాదని, ఒక మాజీ ఆటగాడిగా మాట్లాడుతున్నానని చెప్పాడు. ఏ సమస్య అయినా మాట్లాడుకుంటేనే పరిష్కారమవుతుందన్నాడు. ఐతే మాజీ ఆటగాళ్లు ఏమంటున్నారన్నది ఇక్కడ ముఖ్యం కాదని, బాగా ఆలోచించిన తర్వాతే ప్రభుత్వం ఓ నిర్ణయం తీసుకుంటుందని గవాస్కర్ అన్నాడు.

జి.మనోహర్