బిసీసీఐని హెచ్చరించిన పాకిస్థాన్ క్రికెట్ బోర్డు

Posted: 09/25/2015 06:59 PM IST

దాయాధి దేశం అన్ని విధాలుగానూ తన కపట బుద్దిని ప్రదర్శించేందుకు సిద్దమైంది. ఇన్నాళ్లు భారత్ తో సిరీస్ అడాలని పట్టబడ్డి.. ఈ మేరకు అంతర్జాతీయ క్రికెట్ కౌన్సిల్ అధ్యక్షుడితో మంతనాలు జరిపి భారత్ పై ఒత్తిడి తీసుకువచ్చేందుకు యత్నించిన పాకిస్థాన్.. బిసిసిఐ ఎంతకీ దిగిరాకపోవడంతో.. చేసేది లేక తన నిజస్వరూపాన్ని బట్టభయలు చేసింది. వచ్చే డిసెంబర్ లో యూఏఈలో పాకిస్థాన్ తో జరగాల్సిన ద్వైపాక్షిక సిరీస్ రద్దయితే ఇక భవిష్యత్తులో టీమిండియాతో ఎటువంటి మ్యాచ్ లు ఆడబోమని, ఒక రకంగా భారత మ్యాచ్ లను అన్నింటినీ తాము నిషేధిస్తామని పీసీబీ హెచ్చరించింది. ఈ మేరకు పాకిస్థాన్ క్రికెట్ బోర్డు చైర్మన్ షహర్యార్ ఖాన్ ఓ ప్రకటనలో స్పష్టం చేశారు.

పాకిస్థాన్ తో సిరీస్ కు భారత క్రీడామంత్రిత్వ శాఖను నుంచి బీసీసీఐ ఎటువంటి అనుమతి కోరని పక్షంలో ఇక వారితో మ్యాచ్ లకు దూరంగా ఉంటామని షహర్యార్ ఖాన్ తెలిపారు. ఒకవేళ బీసీసీఐ ఆ సిరీస్ కు రావడానికి ఇష్టపడకపోతే.. వారితో ఇక మ్యాచ్ లు ఆడమని కుండబద్దలు కోట్టినట్లు తేల్చిచెప్పింది. పీసీబీ నిరసన తెలపడానికి ఆ మార్గమే సరైందని ఖాన్ పేర్కొన్నారు. ఇరు దేశాల మధ్య ఐసీసీతో పాటు ఆసియా క్రికెట్ సమాఖ్య నిర్వహించే అన్ని మ్యాచ్ లను బాయ్ కాట్ చేస్తామని హెచ్చరించారు. ఇప్పటికే ఈ సిరీస్ కు సంబంధించి ఆగస్టు 28 వ తేదీన బీసీసీఐకు ఒక లేఖ అందజేశామని... దానిపై స్పష్టత ఇవ్వాల్సి అవసరం బీసీసీఐకు ఉందని కూడా ఆయన అన్నారు.

జి. మనోహర్