రహానేకు రాత్రంతా నిద్రలేకుండా చేసిన ‘షాట్’

Posted: 05/04/2015 03:29 PM IST

ఐసీసీ వరల్డ్ కప్-2015లో అత్యంత దారుణమైన పెర్ఫార్మెన్స్ ను కనబరిచిన ఇండియన్ క్రికెటర్ అజింక్యా రహానే.. ఐపీఎల్-8లో రాజస్థాన్ జట్టు తరఫున అద్భుతమైన ప్రతిభతో దూసుకుపోతున్నాడు. ఈ సీజన్ లో అత్యధిక పరుగులు చేసిన ఆటగాడిలో ముందంజలో వున్నాడు కూడా! రాయల్స్ జట్టు ఆపదలో వున్నప్పుడు చివరివరకు అజేయంగా నిలబడి జట్టును గెలిపించడంలో కీలకపాత్ర పోషిస్తున్నాడు. ఇంతలా రాణిస్తున్న ఈ ఆటగాడిని మాత్రం ఓ ‘షాట్’ తనకు రాత్రంతా నిద్రపట్టనివ్వలేదట! ఈ విషయాన్ని స్వయంగా అతడే వెల్లడిస్తున్నాడు.

వివరాల్లోకి వెళ్తే.. ఈనెల 1వ తేదీన జరిగిన మ్యాచులో రాజస్థాన్ రాయల్స్ జట్టు ముంబై ఇండియన్స్ చేతిలో చిత్తుగా ఓడిపోయింది. ఈ మ్యాచ్ సందర్భంగానే రహానే కేవలం 16 పరుగులు మాత్రమే చేసి వినయ్ కుమార్ బౌలింగ్ లో క్యాచ్ ఔట్ అయ్యాడు. అలా తాను ఔట్ అయిన ఆ వ్యవహారం గురించే తాజాగా రహానే గుర్తు చేసుకున్నాడు. ఆరోజు తాను చాలా చెత్త షాట్ ఆడాడని.. అలా ఆడినందుకు తాను చాలా బాధపడినట్లుగా అతగాడు వెల్లడించాడు. అంతేకాదు.. ఆరోజు రాత్రంతా నిద్రలేకుండా గడిపినట్లుగా అతను తెలిపాడు. తాను ఆ చెత్త షాట్ ఆడకపోయి వుంటే.. జట్టు ఓటమిపాలు కాకుండా గెలుపుదిశగా తీసుకెళ్లే ప్రయత్నం చేసేవాడినన్న అభిప్రాయాన్ని వెల్లడించాడు.

ఈ విషయంపై రహానే మాట్లాడుతూ.. ‘ముంబైతో ఆడిన మ్యాచ్ లో నేను చెత్త షాట్ ఆడినందుకు చాలా బాధపడ్డాను. ఆ రోజు రాత్రంతా నిద్ర లేకుండా గడిపా. ఆ షాట్ గురించి, జట్టు పరాజయం గురించి ఆలోచిస్తూ ఉండిపోయాను’ అని చెప్పాడు. అయితే.. తర్వాతి మ్యాచ్లో కీలక ఇన్నింగ్స్ ఆడి జట్టును గెలిపించాడు. ఈ సీజన్లో రహానె 400 పైచిలుకు పరుగులు చేశాడు.