ఆరంభం అదుర్స్... చివర్లో డీలా

Posted: 02/07/2014 10:03 AM IST

స్వదేశంలోనైనా, విదేశాల్లోనైనా మనోళ్ళు ఆట ఆరంభంలో పులులు... చివరికి పిల్లుల్లా మారిపోతారని చెప్పడానికి గత గణాంకాలెన్నిన్నా తాజాగా మరోసారి గుర్తుచేశారు. ఎలాగు వన్డే సిరీస్ గెలవలేదు కాబట్టి కనీసం టెస్టు సిరీస్ లోనైనా రాణిస్తారని అనుకున్నారు.

కానీ షరా మామూలే. నిన్న న్యూజిలాండ్ లో మొదలైన టెస్టు సిరీస్ లో భారత బౌలర్లు ఆట ఆరంభంలో చకచకా వికెట్లు తీసి మ్యాచ్ పై పట్టు సాధిస్తారనుకుంటే తొలి రోజు ఆట ముగిసే సమయానికి 90 ఓవర్లలో 4 వికెట్లకు 329 పరుగుల భారీ స్కోరు చేసింది. బ్రెండన్ మెకల్లమ్ (210 బంతుల్లో 143 బ్యాటింగ్; 18 ఫోర్లు, 2 సిక్సర్లు), విలియమ్సన్ (172 బంతుల్లో 113; 10 ఫోర్లు, 2 సిక్సర్లు) సెంచరీలతో దుమ్మురేపారు.

మెకల్లమ్‌తో పాటు అండర్సన్ (78 బంతుల్లో 42 బ్యాటింగ్; 5 ఫోర్లు, 1 సిక్సర్) క్రీజులో ఉన్నాడు. 30 పరుగులకే 3 వికెట్లు కోల్పోయి కష్టాల్లో పడిన కివీస్‌ను మెలక్లమ్, విలియమ్సన్ నాలుగో వికెట్‌కు 221 పరుగులు జోడించి ఆదుకున్నారు. జహీర్, ఇషాంత్ చెరో రెండేసి వికెట్లు తీశారు.

రెండో రోజు ఆటలో న్యూజిలాండ్ 329 ఓవర్ నైట్ స్కోరుతో ఆట ప్రారంభించి భారీ స్కోరు చేసింది. 503 పరుగులు చేసి ఆలౌట్ అయింది. తరువాత బ్యాటింగ్ ప్రారంభించిన ఇండియా ఆదిలోనే టపటపా నాలుగు వికెట్లు కోల్పోయింది. విజయ్, ధావన్, పుజరా, కోహ్లీ వెంట వెంటనే అవుట్ అయ్యారు. ప్రస్తుతం రోహిత్ శర్మ 67 బ్యాటింగ్, రహానే 23 పరుగులో క్రీజ్ లో ఉన్నారు.