జైపూర్ లో ఎదురులేని రాయల్స్ - చెన్నై చిత్తు

Posted: 10/05/2013 09:15 AM IST

రెండు అగ్రజట్ల మధ్య పోరాటం ఎంత రసవత్తరంగా ఉంటుందో నిన్న ఛాంపియన్ లీగ్ టి20 తొలి సెమీఫైనల్ చూసిన అభిమానులకు తెలిసొచ్చింది. ఆదిలో ఆట ఏకపక్షంగా సాగినా, చివర్లో మాత్రం నరాలు తెగే ఉత్కంఠతో ముగిసింది. ఇక సొంత గడ్డ పై తనకు తానే సాటి అని నిరూపించుకుంది రాజస్థాన్ రాయల్స్. ఎంత పటిష్టమైన జట్టు అయినా సొంత గడ్డపై తమ ముందు బలాదూరే అని నిరూపించింది. పొట్టి క్రికెట్ ఫార్మాట్ లో ఫేవరెట్ అయిన చెన్నై సూపర్ కింగ్స్ జట్టు ను బోల్తా కొట్టించి రాజసంగా ఛాంపియన్ లీగ్ ఫైనల్లోకి దూసుకెళ్లింది.

నిన్న రాత్రి జైపూర్ లో సవావ్ మాన్ సింగ్ స్టేడియంలో జరిగిన మ్యాచ్ లో చెన్నైని 14 పరుగుల తేడాతో ఓడించి ఇంటికి పంపించింది. ఛాంపియన్ లీగ్ టి20లో లీగ్ దశ నుండి అద్భుతమైన ఆటను కొనసాగిస్తున్న రాజస్థాన్ జట్టు టాస్ ఓడి బ్యాటింగ్ కు దిగింది. 20 ఓవర్లలో 8 వికెట్ల నష్టానికి 159 పరుగులు చేసింది. ఓపెనర్ రహానే (56 బంతుల్లో 70; 6 ఫోర్లు, 2 సిక్సర్లు) అద్భుతమైన ఇన్నింగ్స్‌తో జట్టుకు వెన్నెముకలా నిలిచి అర్ధసెంచరీ చేశాడు. వాట్సన్ (23 బంతుల్లో 32; 4 ఫోర్లు) రహానేకు అండగా నాణ్యమైన ఇన్నింగ్స్ ఆడాడు. ఈ ఇద్దరూ నాలుగో వికెట్‌కు 39 బంతుల్లో 59 పరుగులు జోడించారు.

160 పరుగుల లక్ష్యంతో బరిలో దిగిన చెన్నై జట్టు టాప్ ఆర్డర్ బ్యాట్స్ మెన్స్ చేతులెత్తేయడంతో సూపర్ కింగ్స్ 20 ఓవర్లలో 8 వికెట్ల నష్టానికి 145 పరుగులు మాత్రమే చేసి ఇంటి దారి పట్టింది. చెన్నై 72 పరుగులకే ఏడు వికెట్లు కోల్పోయి ఓదశలో 100 పరుగులు చేస్తుందా అన్న అనుమానం కూడా కలిగింది. కానీ చివర్లో రవిచంద్రన్ అశ్విన్ చెలరేగి 28 బంతుల్లో 46; 3 ఫోర్లు, 3 సిక్సర్లు తో పోరాడినా విజయాన్ని అందించలేకపోయాడు. రాజస్థాన్ బౌలర్లు కట్టడిగా బౌలింగ్ చేశారు. స్పిన్నర్ ప్రవీణ్ తాంబె (3/10) తో జట్టు విజయంలో కీలక పాత్ర పోషించినందుకు మ్యాన్ ఆఫ్ ద మ్యాచ్ అవార్డు దక్కింది.