జీవిత కాలం శిక్ష పడింది

Posted: 09/14/2013 10:37 AM IST

జీవిత కాలం కష్టపడి జాతీయస్థాయి జట్టుకు ఆడే స్థాయికి ఎదిగి, జీవితాన్ని ఎంతో హ్యపీగా గడపాల్సిన వారు శాశ్వతంగా క్రికెట్ కి దూరం అయ్యారు. కారణం కాసులకు కక్కుర్తి పడ్డారు. పొట్టి క్రికెట్ ఫార్మాట్ లో బుకీలతో కలిసి బెట్టింగులకు పాల్పడ్డ కేరళ స్పీడ్ స్టార్ శ్రీశాంత్, అంకిత్ చౌవాన్ లకు జీవితకాల నిషేదాన్ని విధించింది. వీరిని శాశ్వతంగా దేశవాళి క్రికెట్ తో సహా బహిష్కరించి ఫిక్సింగ్ కి పాల్పడాలనే ఆలోచన ఎవరికి రాకుండా  కఠిన శిక్ష వేసింది. తన ప్రతిష్టతో పాటు, దేశ క్రికెట్ ప్రతిష్టను కూడా దెబ్బతీసిన రాయల్స్ క్రికెటర్లు శ్రీశాంత్, అంకిత్ చవాన్‌లపై జీవితకాల నిషేధం విధించింది. అయితే స్పాట్ ఫిక్సింగ్‌తో ప్రమేయమున్న మరికొంతమందికి చిన్న చిన్న శిక్షలతో సరిపెట్టింది. అమిత్ సింగ్‌ను ఐదేళ్లు నిషేధించిన బీసీసీఐ సిద్ధార్థ్ త్రివేదిపై ఏడాది సస్పెన్షన్ వేటు వేసింది. స్పాట్ ఫిక్సింగ్ కి వ్యవహారానికి సంబంధించి, రవి సవానీ నేతృత్వంలో కమిటీని నియమించిన సంగతి తెలిసిందే. ఈ మొత్తం వ్యవహారంపై విచారణ చేపట్టిన సవానీ.. ఆరోపణలెదుర్కొంటున్న శ్రీశాంత్, చవాన్‌లు ఫిక్సింగ్‌కు పాల్పడ్డారని, వారిపై జీవితకాల నిషేధం విధించొచ్చని కమిటీకి సూచించాడు. దీని పై నిర్ణయం తీసుకోవడానికి సమావేశం అయిన బీసీసీఐ ఈ మేరకు నిర్ణయం తీసుకుంది. రాజస్థాన్ రాయల్స్ ఆటగాడు అమిత్ సింగ్‌పై ఐదేళ్లు, త్రివేదిని ఏడాదిపాటు నిషేధించాం. హర్మీత్ సింగ్‌పై సరైన ఆధారాలు లేకపోవడంతో చర్యలు తీసుకోవడం లేదు' అని బీసీసీఐ కార్యదర్శి సంజయ్ పటేల్ తెలిపాడు. గతంలో అజయ్ జడేజా, మహ్మద్ అజరుద్దీన్ ల పై కూడా ఫిక్సింగ్ పై కఠిన చర్యలు తీసుకున్న విషయం తెలిసిందే.