మోదీపై జీవితకాల నిషేధం?

Posted: 09/03/2013 03:30 PM IST

ఐపీఎల్ మాజీ చైర్మన్ లలిత్ మోదీపై జీవితకాల నిషేధం విధించేందుకు బీసీసీఐ సన్నద్ధమవుతోంది. ఈ నెల 25న చెన్నయ్‌లో జరిగే బోర్డు ప్రత్యేక సర్వ సభ్య సమావేశంలో కీలక నిర్ణయం తీసుకోనుంది. కోల్‌కాతాలో జరిగిన వర్కింగ్ కమిటీ సమావేశంలో.. ఐపీఎల్ అవకతవకల్లో మోదీ పాత్రపై జ్యోతిరాదిత్య సింధియా, అరుణ్ జైట్లీతో కూడిన క్రమశిక్షణ కమిటీ సమర్పించిన నివేదికను చర్చించారు. మోదీపై జీవితకాల నిషేధం విధించాలని కమిటీ సిఫారసు చేసినట్టు బోర్డు సీనియర్ అధికారి ఒకరు చెప్పారు. చెన్నయ్ సమావేశంలో దీనిపై నిర్ణయం తీసుకోనున్నారని, ప్రస్తుతానికైతే వేటు వేసే అవకాశాలే ఉన్నాయని తెలిపారు. కాగా మోదీపై జీవితకాల నిషేధం విధించాలంటే సమావేశంలో మూడింట రెండొంతుల మెజారిటీ అవసరం. కనీసం 21 మంది అనుకూలంగా ఓటేయాలి. తొలి మూ డు అంచెలకు ఐపీఎల్ చైర్మన్‌గా ఉన్న మోదీపై అవినీతి ఆరోపణలు రావడంతో 2010లో సస్పెండ్ చేశారు. ప్రస్తుతం ఆయన ఇంగ్లండ్‌లో ఉంటున్నాడు.