పూణె తీరు మారలేదు...ఢిల్లీకి మరో విజయం

Posted: 04/29/2013 12:05 PM IST

ఐపీఎల్ సీజన్ 6లో ఏమాత్రం ప్రేక్షకులను ఆకట్టుకోకుండా, అతిపేవలంగా ఆడుతున్న రెండు జట్లు అయిన ఢిల్లీ డేర్ డెవిల్స్ , పూణె వారియర్స్ మధ్య జరిగిన మ్యాచ్ లో ఢిల్లీ అధ్బుత ప్రతిభ కనబర్చి మ్యాచ్ ని చేజిక్కుంచుకుంటే , గెలవాల్సిన మ్యాచ్ ని చేజేతులా పోగొట్టుకొని పూణె ఉన్న కాస్తంత పరువును మరింత దిగజార్చుకుంది. మంచి మంచి ఆటగాళ్ళు ఉన్న ఢిల్లీ జట్టులోని ఆటగాడు అయిన డేవిడ్ వార్నర్ తన ప్రతాపాన్ని పసికూనలు అయిన పూణెపై చూపించి ఢిల్లీకి విజయాన్ని అందించాడు. కొత్త వేదిక రాయ్‌పూర్‌లో షహీద్ వీర్ నారాయణ్ సింగ్ స్టేడియంలో డేర్‌డెవిల్స్ 15 పరుగుల తేడాతో పుణేవారియర్స్‌ను ఓడించింది.

టాస్ గెలిచిన పుణే ఫీల్డింగ్ ఎంచుకోగా... ఢిల్లీ డేర్‌డెవిల్స్ జట్టు 20 ఓవర్లలో 5 వికెట్ల నష్టానికి 164 పరుగులు చేసింది.టాప్ ఆర్డర్ ఫర్వాలేదనిపించినా, డేవిడ్ వార్నర్ (25 బంతుల్లో 51 నాటౌట్; 4 ఫోర్లు, 4 సిక్సర్లు) మెరుపు అర్ధసెంచరీతో జట్టుకు గైరవ ప్రదమైన స్కోరును అందించాడు.  పుణే వారియర్స్ జట్టు 20 ఓవర్లలో 4 వికెట్ల నష్టానికి 149 పరుగులు మాత్రమే చేసి ఓడిపోయింది. ఓపెనర్లు ఉతప్ప (33 బంతుల్లో 37; 4 ఫోర్లు), ఫించ్ (33 బంతుల్లో 37; 5 ఫోర్లు) తొలి వికెట్‌కు 76 పరుగులు జోడించి శుభారంభాన్నిచ్చారు. వీళ్లిద్దరూ ఓకే ఓవర్లో అవుటైనా... యువరాజ్ సింగ్ (24 బంతుల్లో 31; 4 ఫోర్లు), లూక్ రైట్ (18 బంతుల్లో 19; 3 ఫోర్లు) కలిసి నిలకడగా ఆడారు. ఈ దశలో పుణే విజయం ఖాయమనిపించింది. విజయానికి 18 బంతుల్లో 37 పరుగులు చేయాల్సిన దశలో.. ఉమేశ్ యాదవ్ వేసిన ఓవర్లో ఈ ఇద్దరూ అవుటయ్యారు. ఈ రెండు వికెట్లతో సీన్ మారిపోయింది. స్మిత్ (8 బంతుల్లో 17 నాటౌట్; 2 ఫోర్లు, 1 సిక్సర్) పోరాడినా పూణె జట్టును ఓటమి నుండి తప్పించలేక పోయారు.