Posted: 04/04/2013 11:33 AM IST

ఐపీఎల్ - 6 ఆరంభ మ్యాచ్ లో డింపెండింగ్ ఛాంపియన్ అయిన కోల్ కత్తా నైట్ రైడర్స్ తన సొంత మైదానంలో ఢిల్లీ డేర్ డెవిల్స్ పై శుభారంభం చేసింది. మొన్న ఆ ఫ్రాంఛైజీ ఓనర్ షారుఖ్ ఖాన్ తన ఆట పాటలతో ఉర్రూతలు ఊగిస్తే... నిన్న ఆ జట్టు ఆటగాళ్ళు తన ఆట ప్రదర్శనతో ప్రేక్షకులకు ఆనందాన్ని పంచారు. మొదట టాస్ గెలిసి ఫీల్డింగ్ ఎంచుకున్న కోల్ కత్తా మొదటి నుండి దూకుడును ప్రదర్శించింది. తొలి ఓవర్లోని తొలి బంతికే ఉన్ముక్తు ను బ్రెట్ లీ అవుట్ చేయడంతో ఢిల్లీ పతనం ప్రారంభం అయింది. ఆ తరువాత సునీల్ నరైన్ (4/13) బౌలింగ్‌కు 128 పరుగుల స్వల్ప స్కోరుకే చాపచుట్టేసింది. కెప్టెన్ జయవర్ధనే (52 బంతుల్లో 66; 8 ఫోర్లు, 1 సిక్స్) మినహా ఎవరూ కనీస ప్రదర్శన కూడా ఇవ్వలేకపోయారు. అనంతరం లక్ష్యాన్ని చేధించడానికి బరిలో దిగిన కోల్ కత్తా కెప్టెన్ గంభీర్ (29 బంతుల్లో 42; 5 ఫోర్లు, 1 సిక్స్) చక్కటి ఇన్నింగ్స్‌కు తోడు కలిస్ (20 బంతుల్లో 23; 5 ఫోర్లు), మనోజ్ తివారీ (23 బంతుల్లో 23; 2 ఫోర్లు) చక్కటి సహకారం అందించారు. దీంతో ఎనిమిది బంతులు మిగిలి ఉండగానే కేవలం నాలుగు వికెట్లు కోల్పోయి ఆ జట్టు విజయం సాధించింది. నరైన్‌కు మ్యాన్ ఆఫ్ ద మ్యాచ్ అవార్డు లభించింది.