Posted: 03/04/2013 01:25 PM IST

ఆస్ట్రేలియాతో సిరీస్ లో భాగంగా, భారత్ తో హైదరాబాద్ లోని ఉప్పల్ రాజీవ్ గాంధీ స్టేడియంలో జరుగుతున్న రెండో టెస్టు మ్యాచ్ లో భారత ఆటగాళ్ళు తన ప్రతాపాన్ని చూపించారు. మొదటి రోజు ఆసీస్ ని బౌలింగ్ తో ఆడుకున్న మనవాళ్లు రెండో రోజు బ్యాటింగ్ తో ఆడుకున్నారు. మొదట బ్యాటింగ్ చేసిన ఆస్ట్రేలియాను 239 పరుగులకే కట్టడి చేశారు. ఇక రెండోరోజు 5 పరుగుల ఓవర్ నైట్ స్కోరుతో బ్యాటింగ్ ప్రారంభించిన టీం ఇండియా కొద్దిసేపటికే సెహ్వాగ్ వికెట్ కోల్పోయింది. అనంతరం క్రీజులోకి వచ్చిన పుజారా, మురళి విజయ్ లు కలిసి చెలరేగి ఆడి స్పోర్టింగ్ వికెట్‌పై నిలకడగా ఆడుతూ భారీ భాగస్వామ్యం నమోదు చేశారు. మురళీ విజయ్ (288 బంతుల్లో 129 బ్యాటింగ్; 17 ఫోర్లు, 2 సిక్సర్లు), చతేశ్వర్ పుజారా (251 బంతుల్లో 162 బ్యాటింగ్; 25 ఫోర్లు; 1 సిక్సర్) అజేయ సెంచరీలతో అలరించారు. దీంతో ఆస్ట్రేలియాతో జరుగుతున్న రెండో టెస్టులో భారత్ ఆధిక్యం సాధించింది.

ఇక మూడోరోజు ఆట ప్రారంభించిన పుజారా టెస్ట్ల్లో వెయ్యి పరుగులు పూర్తి చేయటంతో పాటు 332 బంతుల్లో ద్విశతకం నమోదు చేశాడు. టెస్ట్ కెరీర్లో పుజారాకు ఇది రెండో సెంచరీ. 204 వ్యక్తిగత స్కోరు వద్ద పుజరా అవుట్ అయ్యాడు. ఇక మురళీ విజయ్ కూడా 167 పరుగులు చేసి వెనుదిరిగాడు. దీంతో మురళీ, పుజారా 370 పరుగుల భాగస్వామ్యానికి తెరపడింది. లంచ్ విరామ సమయానికి భారత్ మూడు వికెట్ల నష్టానికి 400 పరుగులు చేసింది. ఇక ప్రస్తుతం భారత్ స్కోరు 460.