Posted: 01/25/2013 06:22 PM IST

అత్యధిక ధనార్జన గల భారత క్రీడాకారుడిగా టీమిండియా కెప్టెన్ ధోనీ తన స్థానాన్ని నిలబెట్టుకున్నాడు. అత్యంత సంపాదన, ప్రజాదరణ గల వందమంది భారత సెలెబ్రిటీల జాబితాను ఫోర్బ్స్ మేగజైన్ విడుదల చేసింది. దీని ప్రకారం 2011 అక్టోబర్ నుంచి 2012 సెప్టెంబర్ వరకు మహీ దాదాపు 135.16 కోట్ల రూపాయలను ఆర్జించాడు. అంతకుముందు ఏడాది కూడా మహీదే మొదటి స్థానం. ఇక తాజా ఓవరాల్ జా బితాలో బాలీవుడ్ బాద్షా షారుక్ ఖాన్ (202.8 కోట్లు) తొలి స్థానం సొంతం చేసుకున్నాడు. షారుక్ తర్వాతి స్థానాలు కండల వీరుడు సల్మాన్ ఖాన్, ధోనీవి. కాగా పాపులారిటీ పరంగా సల్మాన్, ధోనీ.. షారుక్‌ను వెనక్కినెట్టడం విశేషం. టాప్-50లో యువ బ్యాట్స్‌మన్ కోహ్లీ, సైనా నెహ్వాల్, సానియామీర్జా ఉన్నారు. జాబితాలో అత్యంత పిన్న వయస్కురాలుగా లండన్ కాంస్య పతక విజేత, 23 ఏళ్ల సైనా నెహ్వాల్ నిలిచింది.