Posted: 12/29/2012 09:01 AM IST

ట్వంటీ-20లో భాగంగా పాకిస్థాన్‌తో జరిగిన రెండో ట్వంటీలో భారత్ 11 పరుగుల తేడాతో విజయం సాధించింది. తొలి ట్వంటీ-20లో ఓటమి పాలైన భారత్ ప్రతీకారం తీర్చుకుని సిరీస్‌ను సమం చేసింది. మొదట టాస్ గెలిచి ఫీల్డింగ్ ఎంచుకున్న పాకిస్థాన్ బౌలర్లకు భారత బ్యాట్స్ మెన్స్ చుక్కలు చూపించారు. చాలా రోజుల తరువాత మనవాళ్ల బ్యాటింగ్ పవరేంటో మరో సారి తెలియజెప్పారు. ఓపెనర్స్ బ్యాట్స్ మెన్స్ గంభీర్, రహానేలు చక్కని ఓపెనింగ్ ఇచ్చారు. గంభీర్ 21 పరుగులు, రహానే 28 పరుగులు చేసి అవుటయ్యారు. తరువాత వచ్చిన యువరాజ్ సింగ్, ధోనిలు పాకిస్థాన్ బౌలర్లకు చుక్కలు చూపించారు. యువరాజ్ 36 బంతుల్లో 72 పరుగులు చేయగా, ధోని అతనికి చక్కని సహారం అందించి 33 పరుగులు చేసి అవుటయ్యాడు. ఇక నిర్ణీత 20 ఓవర్లు ముగిసే సరికి భారత్ 192 పరుగులు ఐదు వికెట్లు కోల్పోయి చేసింది. ఇక పాక్ ముందు 193 పరుగుల విజయ లక్ష్యాన్ని ఉంచింది.

193 పరుగుల విజయ లక్ష్యంతో బరిలో దిగిన పాక్ కూడా ధీటుగానే ఆడినా, చివర్లో చతికిలబడింది. ఓపెనర్ జంషెడ్ (41), అహ్మద్ షహ్‌జాద్ (31) పరుగులతో శుభారంభాన్నిచ్చారు. ఈ జోడి పెవిలియన్‌కు చేరిన అనంతరం కెప్టెన్ హఫీజ్ (55), ఉమర్ అక్మల్ (24) రాణించినా ఫలితం దక్కలేదు. నిర్ణీత 20 ఓవర్లలో 7 వికెట్లు కోల్పోయి 181 పరుగుల చేసిన పాక్ పరాజయం చవిచూసింది. భారత్ బౌలర్లలో దిండా మూడు వికెట్లు తీయగా, భువనేశ్వర్ కుమార్, ఇషాంత్ శర్మ, అశ్విన్, యువరాజ్‌లకు తలో వికెట్టు లభించింది. భారత్ విజయంలో కీలక పాత్ర పోషించిన యువరాజ్‌కు మ్యాన్ ఆఫ్ ద మ్యాచ్ దక్కగా, ఈ సిరీస్‌లో ఆకట్టుకున్న హఫీజ్‌కు మ్యాన్ ఆఫ్ ద సిరీస్ అవార్డు దక్కింది.