Posted: 12/26/2012 09:05 AM IST

దాయాదుల చేతిలో భారత్ ఓడిపోయింది. ఇంగ్లాండ్ సిరీస్ నుండి వరుస వైఫల్యాలతో ఉన్న భారత్ పాకిస్థాన్ పై కూడా ఓడి మరోసారి తామేంటో నిరూపించుకున్నారు. ఐదు సంవత్సరాల తరువాత భారత్ లో జరిగిన టి20 మ్యాచ్ లో భారత్ చేజేతులా ఓడిపోయి పరువు పోగొట్టుకున్నారు. నిన్న రాత్రి చిన్నస్వామి స్టేడియంలో జరిగిన తొలి డే అండ్ నైట్ ట్వంటీ-20లో పాకిస్థాన్ 5 వికెట్ల తేడాతో విజయం సాధించింది. భారత్ 10 ఓవర్లలో 75-0తో పటిష్ట స్థితిలో  ఉన్నట్లే కనిపించింది. భారత్ భారీ స్కోరు చేయడం ఖాయం అనుకున్నారు. కానీ మన బ్యాట్స్ మెన్స్ వరుసగా క్యూ కట్టడంతో 133 పరుగుల లక్ష్యాన్ని మాత్రమే నిర్దేషించింది. భారత్ విసిరిన 134 పరుగుల స్వల్ప లక్ష్యాన్ని ఛేదించడానికి బరిలోకి దిగిన పాకిస్థాన్ ఆదిలో తడబడినా చివరకు గట్టెక్కింది. నాలుగు ఓవర్లకే 17 పరుగులు చేసి మూడు వికెట్లు కోల్పోయిన పాకిస్థాన్‌ను షోయబ్ మాలిక్ (57), హఫీజ్ (61)లు ఆదుకున్నారు. వీరివురూ రాణించడంతో భారత్‌పై పాకిస్థాన్ తొలి ట్వంటీ విజయాన్ని చేజిక్కించుకుంది. చివరి ఓవర్‌కు 10 పరుగులు చేయాల్సిన పాక్ ఎట్టకేలకు జయకేతనం ఎగురవేసింది. భారత్ బౌలర్లలో భువనేశ్వర్ కుమార్ మూడు వికెట్లు తీయగా, దిండా, ఇషాంత్‌లకు తలో వికెట్టు దక్కింది.