Posted: 12/23/2012 11:38 AM IST

రెండు మ్యాచ్‌ల సిరీస్‌లో ఒక మ్యాచ్ నెగ్గి... రెండో మ్యాచ్‌లో భారీ స్కోరు చేశాక కూడా భారత్ సిరీస్ గెలవలేకపోయింది. పేలవమైన బౌలింగ్, చెత్త ఫీల్డింగ్‌తో గెలవాల్సిన మ్యాచ్‌ను వదిలేసుకుంది. కెప్టెన్ మోర్గాన్ ఆఖరి బంతికి సిక్సర్ కొట్టడంతో ఇంగ్లండ్ జట్టు రెండో టి20లో ఆరు వికెట్ల తేడాతో గెలిచి లెక్క సరిజేసింది.

ఆద్యంతం ఉత్కంఠభరితంగా సాగిన మ్యాచ్‌లో ఇంగ్లండ్ పైచేయి సాధించింది. భారత్ పర్యటనలో పూర్తి స్థాయి ఆటతో ఆకట్టుకుంటున్న ఇంగ్లండ్ మరోమారు తన సత్తా చాటింది. తొలి ట్వంటీ-20లో ఓటమి పాలై కాసింత నిరాశ చెందిన ఇంగ్లండ్ యువ ఆటగాళ్ల జోరుకు భారత్ చేతులెత్తేసింది. చివరి బంతిని సిక్స్‌గా మలచి ఒత్తిడిలో ఎలా ఆడాలో భారత్‌కు తెలియచెప్పింది.  ట్వంటీ-20 సిరీస్ లో భాగంగా భారత్‌తో జరిగిన రెండో మ్యాచ్‌లో ఇంగ్లండ్ 6 వికెట్ల తేడాతో విజయం సాధించి సిరీస్‌ను సమం చేసింది. 178 పరుగుల విజయలక్ష్యంతో బ్యాటింగ్ ఆరంభించిన ఇంగ్లండ్ ఆది నుంచి దూకుడగానే ఆడింది.

లంబ్, హాల్స్‌లు ఇంగ్లండ్‌ను ఇన్నింగ్స్ ధాటిగా ఆరంభించారు. లంబ్ (50), హాల్స్ (42) పరుగులతో శుభారంభాన్నిచ్చారు. హాఫ్ సెంచరీ చేసిన లంబ్‌ను, రైట్‌ను యువరాజ్ పెవిలియన్‌కు పంపిచడంతో ఇంగ్లండ్ కాసింత నిరాశ గురైంది. కాగా మోర్గాన్ (49), బట్లర్(15)లు దూకుడుగా ఆడి ఇంగ్లండ్‌కు విజయాన్ని చేకూర్చారు. భారత్ బౌలర్లలో యువరాజ్ మూడు వికెట్లు మినహా ఎవరూ ఆకట్టుకోలేకపోయారు.