Posted: 12/22/2012 10:59 AM IST

హైదరాబాద్ అభిమానులు ఎంతో ఇష్టపడ్డ ఐపీఎల్ జట్టు డెక్కన్ చార్జర్స్ చేజారిపోయినా, దాని స్థానంలో కొత్తగా సన్ రైజర్స్ జట్టు వచ్చి చేరింది. ఇది హైదరాబాద్ జట్టే. మరింత సంతోషకరమైన విషయం ఏంటంటే... ఐపీఎల్-6లో కొత్త ఫ్రాంచైజీ సన్‌రైజర్స్ తన ఎనిమిది హోమ్ మ్యాచ్‌లను హైదరాబాద్‌లోనే ఆడనుంది. గతంలో మాదిరిగా విశాఖపట్నం, కటక్‌లో కాకుండా ఈసారి మొత్తం మ్యాచ్‌లను నగరానికే కేటాయించింది. ఏప్రిల్ 5న పుణే వారియర్స్‌తో... సన్‌రైజర్స్ తొలి మ్యాచ్ ఆడుతుంది. ఏప్రిల్ 3న ఈడెన్ గార్డెన్స్‌లో డిఫెండింగ్ చాంపియన్ కోల్‌కతా నైట్‌రైడర్స్, ఢిల్లీ డేర్‌డెవిల్స్ మ్యాచ్‌తో ఈ మెగా ఈవెంట్ ప్రారంభమవుతుంది. తొమ్మిది జట్లు ఇంటా, బయటా పద్ధతిలో ఒక్కో టీమ్ 16 మ్యాచ్‌లు ఆడుతుంది. టాప్-4లో నిలిచిన జట్లు ప్లే ఆఫ్‌కు అర్హత సాధిస్తాయి. మొత్తం 76 మ్యాచ్‌లు జరుగుతాయి. మే 21, 22న జరిగే క్వాలిఫయర్-1, ఎలిమినేటర్ మ్యాచ్‌లకు చెన్నై, మే 24, 26న జరిగే క్వాలిఫయర్-2, ఫైనల్ మ్యాచ్‌లకు కోల్‌కతా ఆతిథ్యమిస్తున్నాయి. సొ... హైదరాబాద్ అభిమానులకు పండగ అన్నమాటే.