Posted: 11/18/2012 04:33 PM IST

గ్రామీణ స్థాయిలోని మట్టిలో మాణిక్యాలకు అండగా నిలిచేందుకు కేంద్ర క్రీడాశాఖ ప్రణాళికలు రచిస్తోంది. ఇందుకోసం స్పోర్ట్స్ యూనివర్శిటీలు, స్పోర్ట్స్ స్కూళ్లు, సెంటర్స్ ఆఫ్ ఎక్సలెన్స్ ఏర్పాటు చేయాలని నిర్ణయించింది. 61వ అఖిల భారత పోలీస్ చాంపియన్‌షిప్‌ను ప్రారంభించిన సందర్భంగా కేంద్ర క్రీడా మంత్రి జితేంద్ర సింగ్ ఈ విషయాన్ని వెల్లడించారు. స్పోర్ట్స్ స్కూళ్లు, స్పోర్ట్స్ యూనివర్శిటీలతో పాటు దేశవ్యాప్తంగా 30 సెంటర్స్ ఆఫ్ ఎక్సలెన్స్ ఏర్పాటు చేయడానికి క్రీడా శాఖ ఏర్పాట్లు చేస్తోందని ఆయన చెప్పారు. వీటిలో క్రీడలకు అవసరమైన సకల సౌకర్యాలను ఏర్పాటు చేస్తామని తెలిపారు.
       కాగా, పోలీసు క్రీడలు ఢిల్లీలోని ఇందిరా గాంధీ ఇండోర్ స్టేడియం, జవహర్‌లాల్ నెహ్రూ స్టేడియంలో నాలుగు రోజులు జరుగుతాయి. రెజ్లింగ్, వెయిట్‌లిఫ్టింగ్, జూడో, జిమ్నాస్టిక్స్, బాక్సింగ్ తదితర క్రీడలకు సంబంధించిన పోటీలు జరుగుతాయి. సెంట్రల్ పోలీస్ రిజర్వ్ ఫోర్స్ ఈ క్రీడలను నిర్వహిస్తోంది.

        ఇదిలా ఉండగా,  మకావ్ గ్రాండ్ ప్రీ రేస్‌లో విషాదం చోటు చేసుకుంది. హాంకాంగ్ డ్రైవర్ ఫిలిప్ యావూ (40) నడుపుతున్న కారు ప్రమాదానికి లోనుకావడంతో అతను తీవ్రంగా గాయపడ్డాడు. ఆసుపత్రికి తరలించిన తర్వాత చికిత్స పొందుతూ అతను మృతి చెందాడు. మకావ్ గ్రాండ్ ప్రీ నిర్వాహకులు ఈ ప్రమాదంపై ఎలాంటి ప్రకటన విడుదల చేయలేదు. అయతే, టీవీ ఫుటేజీల్లో ఫిలిప్ నడిపిస్తున్న చెవర్లట్ క్రూజ్ కారు ప్రమాద వశత్తు పల్టీలు కొట్టింది. అదే సమయంలో మంటలు చెలరేగడంతో ఫిలిప్ బైటపడే అవకాశం లేకపోయంది. ఇటీవలే  జరిగిన ప్రమాదంలో పోర్చుగీస్ మోటార్‌బైక్ రేసర్ లూయస్ కారిరా దుర్మరణం చెందగా, మరో ప్రమాదం చోటు చేసుకోవడం మోటార్ స్పోర్ట్స్‌లో భద్రతపై అనుమానాలను రేకెత్తిస్తున్నది.

...avnk