Posted: 11/11/2012 06:26 PM IST

ఐపిఎల్ క్రికెట్ తరహాలో ఐబిఎల్ బ్యాడ్మింటన్ పోటీలు జరుగబోతున్నాయ్. అందుకోసం భారత్‌కు చెందిన సైనా నెహ్వాల్, గుత్తా జ్వాల, అశ్విని పొన్నప్ప, పి.వి.సింధు, పారుపల్లి కశ్యప్‌లను ‘ఐకాన్ ప్లేయర్స్’గా నియమించారు. ఈ ఐదుగురికి కనీస ధరగా 50 వేల డాలర్లు(రూ. 27 లక్షల 34 వేలు)గా నిర్ణయించారు. ప్రతి జట్టులో మొత్తం 11 మంది క్రీడాకారులు ఉంటారు. గరిష్టంగా నలుగురు విదేశీ ఆటగాళ్లను తీసుకునే వీలుంది. ప్రతి జట్టులో అండర్-20 విభాగానికి చెందిన ఒక క్రీడాకారుడు తప్పకుండా ఉండాలి. ఆటగాళ్ల ఒప్పందం ఐదేళ్లపాటు ఉంటుంది. ఫ్రాంచైజీ తరఫున రెండేళ్లపాటు ఆడాలి. ఐబీఎల్‌లోని పోటీలు సుదిర్మన్ కప్ తరహాలో జరుగుతాయి. ప్రతి పోటీలో ఐదు మ్యాచ్‌లు (పురుషుల, మహిళల సింగిల్స్, డబుల్స్, మిక్స్‌డ్ డబుల్స్) జరుగుతాయి. కేవలం విజేత, రన్నరప్ జట్లకు మాత్రమే ప్రైజ్‌మనీ ఇస్తారు. విజేత జట్టుకు 65 శాతం; రన్నరప్ జట్టుకు 35 శాతం ప్రైజ్‌మనీ లభిస్తుంది. విజేత ఫ్రాంచైజీకి రూ.3 కోట్ల 50 లక్షలకుపైగా లభించే అవకాశముంది.
       ‘ఐకాన్ ప్లేయర్స్’ను మినహాయించి... వేలంపాటలో టాప్-10 ర్యాంకింగ్స్‌లోని విదేశీ ఆటగాళ్లకు కనీస ధరగా 25 వేల డాలర్లు; 11 నుంచి 25 ర్యాంకుల్లోపు వారికి 15 వేల డాలర్లు; 26 ఆపై ర్యాంక్ ఉన్న వారికి 5 వేల డాలర్లు నిర్ణయించారు. ప్రపంచ ర్యాంకింగ్స్‌లోని టాప్-20లో ఉన్న భారత ఆటగాళ్ల కనీస ధర 20 వేల డాలర్లు ఉంటుంది. అంతర్జాతీయ భారతీయ క్రీడాకారులకు 10 వేల డాలర్లు; జాతీయ క్రీడాకారులకు 5 వేల డాలర్లు; జూనియర్ క్రీడాకారులకు 3 వేల డాలర్లు కనీస ధర ఉంటుంది.