Posted: 08/10/2012 10:08 PM IST

ప్రపంచ కప్‌లో ఆడేందుకు భారత జట్టును బీసీసీఐ శుక్రవారం ఎంపిక చేసింది. శ్రీలంకలో జరిగే ఐసీసీ ట్వంటీ 20 ప్రపంచ కప్ పోటీలకు ఎంపిక చేసిన 15 మందితో కూడిన భారత జట్టుకు యువరాజ్ సింగ్‌ను భారత క్రికెట్ నియంత్రణ మండలి సెలక్టర్లు ఎంపిక చేశారు. లక్ష్మీపతి బాలాజీ, పియూష్ చావ్లాలతో పాటు స్పిన్నర్ హర్భజన్ సింగ్‌కు కూడా ట్వంటీ 20 జట్టులో స్థానం లభించింది.క్యాన్సర్ వ్యాధికి చికిత్స పొందిన ఆల్ రౌండర్ యువరాజ్ సింగ్ తిరిగి జట్టులోకి వచ్చాడు.

యువరాజ్ సింగ్ 2011 నవంబర్‌లో వెస్టిండీస్‌తో జరిగిన టెస్టు మ్యాచులో చివరిసారి ఆడాడు. అప్పటి నుంచి అతను క్రికెట్‌ క్రీడకు దూరంగానే ఉన్నాడు. గతవారం ప్రాక్టీస్ గేమ్ ఆడాడు. బెంగళూర్‌లో అండర్ -19 ప్రపంచ కప్ ఆటగాళ్లతో జరిగిన ప్రాక్టీస్ మ్యాచులో అతను బ్యాట్ పట్టాడు. క్యాన్సర్ వ్యాధికి అతను అమెరికాలో చికిత్స చేయించుకున్న విషయం తెలిసిందే. అలాగే న్యూజిలాండ్‌తో స్వదేశీ గడ్డపై జరిగే టెస్టు సిరీస్‌ల్లో మొదటి రెండు టెస్టులకు కూడా సెలెక్టర్లు భారత జట్టును ఎంపిక చేశారు. ఈ జట్టులో హైదరాబాదీ స్టైలిష్ బ్యాట్స్‌మన్ వివియస్ లక్ష్మణ్‌కు చోటు దక్కింది. న్యూజిలాండ్‌తో మొదటి టెస్టు మ్యాచు ఈ నెల 23వ తేదీన హైదరాబాదులోని రాజీవ్ గాంధీ అంతర్జాతీయ మైదానంలో ప్రారంభమవుతుంది. రెండో టెస్టు మ్యాచ్ ఆగస్టు 31వ తేదీ నుంచి చెన్నైలోని చిన్నస్వామి స్టేడియంలో జరుగుతుంది.