Posted: 01/31/2012 08:53 PM IST

వందో సెంచరీకి అడుగు దూరంలో ఉన్న బ్యాటింగ్ మ్యాస్ట్రో సచిన్ రిటైర్మెంట్‌పై పాకిస్తాన్ మాజీ కెప్టెన్ ఇమ్రాన్ ఖాన్ సంచలన వ్యాఖ్యలు చేశాడు. గతేడాది ప్రపంచ కప్ గెల్చినప్పుడే సచిన్ అంతర్జాతీయ క్రికెట్‌కు వీడ్కోలు చెప్పివుంటే బావుండేదని ఇమ్రాన్ అభిప్రాయపడ్డాడు. మాస్టర్‌కదే చివరి దశని వ్యాఖ్యానించాడు. 'అత్యున్నత విజయంతో కెరీర్ ముగించాలని ఆటగాళ్లందరూ కోరుకుంటారు. అయితే అన్నిసార్లూ అది సాధ్యం కాదు. వన్డే ప్రపంచ కప్ అనంతరం సచిన్ గుడ్ బై చెప్పడానికి సరైన సమయం. ప్రతిష్టాత్మక ప్రపంచ కప్ గెలిచిన అనుభూతి పొందాడు' అని ఇమ్రాన్ అన్నాడు. కాగా ఎప్పుడు రిటైరవ్వాలన్నది సచిన్ నిర్ణయించుకోవాల్సిన అంశమని పేర్కొన్నాడు.

ఆస్ట్రేలియాతో టెస్టు సిరీస్‌లో వైట్‌వాష్ పరాభవంతో కెరీర్‌కు గుడ్ బై చెప్పాలని ఎవరూ కోరుకోరని అన్నాడు. భారత క్రికెటర్లకు వారు కోరుకున్నప్పుడు రిటైరయ్యే హక్కుందని ఇమ్రాన్ వ్యాఖ్యానించాడు. ఇక సచిన్ వందో సెంచరీపై మాట్లాడుతూ.. అలాంటి గొప్ప ఆటగాడు ఆ రికార్డు సాధిస్తాడా లేదా అన్నది చర్చనీయాంశమే కాదని అన్నాడు. 'జట్టు విజయాల కోసమే రికార్డులు బద్దలుకొట్టాలి. రికార్డుల కోసం ఆడరాదు. రికార్డులనేవి విజయంలో ఓ భాగం' అని ఇమ్రాన్ చెప్పాడు. టి-20లకు, ఐపీఎల్‌కు భారత్ ఎక్కువ ప్రాధాన్యమిస్తే టెస్టు క్రికెట్ నుంచి వైదొలగకతప్పదని హెచ్చరించాడు.