వెంకీ వెయిట్ చేయిస్తే నాగ్ ఓకే చేశాడా?

Posted: 10/17/2016 06:08 PM IST

సినిమా సినిమాకు సంబంధం లేకుండా, కొత్త జోనర్ లతో హిట్ల మీద హిట్లు కొడుతూ జూనియర్లకు కూడా గట్టి పోటీ ఇస్తున్నాడు నాగార్జున. సంక్రాంతికి సోగ్గాడే చిన్నినాయనతో లైఫ్ లో సిసలైన బ్లాక్ బస్టర్ చవిచూసి, ఆపై ఊపిరితోనూ సక్సెస్ చవిచూశాడు. ప్రస్తుతం హథీరాం అవతారంలో బిజీగా ఉన్న నాగ్, తర్వాత ప్రాజెక్టుపై ఇంకా క్లారిటీ ఇవ్వలేదు.

కానీ, ప్రస్తుతం అందుతున్న సమాచారం ప్రకారం ఓ దెయ్యం పాత్రలో కనిపించబోతున్నాడనే అంటున్నాయి ఫిల్మ్ నగర్ వర్గాలు. రాజుగారి గదితో హిట్ చవిచూసిన యాంకర్ కమ్ దర్శకుడు ఓంకార్ త్వరలో ఆ సినిమాకు సీక్వెల్ ఫ్లాన్ చేస్తున్నాడు. ఇందులో దెయ్యం పాత్రలో కనిపించేందుకు సుముఖతతో ఉన్నాడంట.

తొలుత ఈ పాత్ర కోసం మరో సీనియర్ హీరో వెంకటేష్ ను అనుకున్నారు. ఆ విషయాన్ని వెంకీ కూడా ఒప్పుకున్నాడు. ఇప్పటికే రెండు చిత్రాలతో (గురు, ఆడాళ్లు మీకు జోహార్లు) బిజీగా ఉండటంతో అది కాస్త లేట్ అయ్యే అవకాశాలు ఉన్నాయి. దీంతో నాగ్ ను సంప్రదించగా, స్క్రిప్ట్, తన పాత్రను తీర్చిదిద్దిన విధానం నచ్చిన నాగ్ రెడీ అయినట్లు తెలుస్తోంది. పీవీపీ బ్యానర్ పై నిర్మించబోతున్న రాజుగారి గది-2 గురించి త్వరలోనే అఫీషియల్ అనౌన్స్ మెంట్ వెలువడే అవకాశం ఉంది.