త్రివిక్రమ్ ‘అఆ’ నుంచి అనిరుధ్ ఔట్?

Posted: 01/22/2016 05:09 PM IST

‘అత్తారింటికి దారేది’, ‘సన్నాఫ్ సత్యమూర్తి’ వంటి వరుస హిట్ చిత్రాల తర్వాత దర్శకుడు త్రివిక్రమ్ శ్రీనివాస్ దర్శకత్వంలో రూపొందుతున్న తాజా చిత్రం ‘అ ఆ’. ‘అనసూయ రామలింగం’ వర్సెస్ ‘ఆనంద్ విహారి’ అన్నది ఉప శీర్షిక. హారిక అండ్ హాసిని క్రియేషన్స్ బ్యానర్ పై నిర్మాత రాధాకృష్ణ నిర్మిస్తున్నారు.

నితిన్, సమంత, అనుపమ పరమేశ్వరన్(మలయాళ చిత్రం ‘ప్రేమమ్’ ఫేం) హీరోహీరోయిన్లుగా నటిస్తున్నారు. ఈ సినిమాకు ముందుగా తమిళ సంగీత దర్శకుడు అనిరుధ్ ను ఖరారు చేసారు. తాజా సమాచారం ప్రకారం... త్రివిక్రమ్ స్టైల్ కు తగ్గట్లుగా తన మ్యూజిక్ మ్యాచ్ కుదరడంలేదనే ఉద్దేశ్యంతో.. అనిరుధ్ ఈ ప్రాజెక్టు నుంచి తప్పుకున్నట్లుగా తెలిసింది.

దీంతో ఈ సినిమా కోసం తన హిట్ మ్యూజిక్ డైరెక్టర్ అయినటువంటి దేవిశ్రీప్రసాద్ ను తీసుకోవాలని త్రివిక్రమ్ భావిస్తున్నట్లుగా తెలుస్తోంది. దేవితో పాటు మిక్కీ జే మేయర్ పేరు కూడా పరిశీలిస్తున్నారు. త్వరలోనే ఈ చిత్రానికి సంబంధించిన అన్నివివరాలను అధికారికంగా ప్రకటించనున్నారు.

ఇటీవలే షూటింగ్ ను ప్రారంభించారు. రెగ్యులర్ షూటింగ్ జరిపి, ఫిబ్రవరిలో వాలెంటైన్స్ డే సంధర్భంగా సినిమాను విడుదల చేయాలని సన్నాహాలు చేస్తున్నారు. లవ్, రొమాంటిక్, ఫ్యామిలీ ఎంటర్ టైనర్ గా రూపొందుతోంది. మరి ఈ సినిమాకు చివరగా ఏ సంగీత దర్శకుడు సంగీతం అందించనున్నాడో చూడాలి.