సూర్యతో రొమాన్స్ చేయనున్న రెజీనా?

Posted: 01/25/2016 09:48 AM IST

ప్రస్తుతం వరుస హిట్ చిత్రాలతో తెలుగులో యువ స్టార్ హీరోయిన్ గా కొనసాగుతున్న రెజీనాకు కోలీవుడ్ లో ఓ భారీ బంపర్ ఆఫర్ వచ్చింది. గతకొద్ది కాలంగా తెలుగు హీరోయిన్లంతా కూడా తమిళంలో కూడా వరుస అవకాశాలను దక్కించుకుంటూ బిజీగా వున్నారు. శ్రీదివ్య, ప్రియా ఆనంద్, అంజలి, బిందు మాధవి వంటి తెలుగు భామలు ప్రస్తుతం తమిళంలో వరుస సినిమాలతో బిజీగా వున్నారు.

అయితే అదే బాటలోకి రెజీనా కూడా చేరిపోయింది. ఇప్పటికే తమిళంలో ‘కేడి బిల్లా కిలాడి రంగా’ సినిమాలో నటించి, మంచి పేరును దక్కించుకుంది. తాజాగా రెజీనాకు ప్రముఖ దర్శకుడు సెల్వరాఘవన్ సినిమాలో నటించే అవకాశం దక్కింది. సెల్వరాఘవన్ దర్శకత్వంలో ఎస్.జే.సూర్య హీరోగా ఓ చిత్రం తెరకెక్కనున్న విషయం తెలిసిందే. ఇందులో హీరోయిన్ గా రెజీనాను ఎంపిక చేసినట్లుగా తెలిసింది.

గతంలో సెల్వరాఘవన్ తెలుగులో ‘ఆడవారి మాటలకు అర్థాలే వేరులే’, ‘7జి బృందావన్ కాలనీ’ వంటి హిట్ చిత్రాలను తెరకెక్కించాడు. అయితే ఈసారి మాత్రం ఓ హర్రర్ స్టోరీతో ప్రేక్షకుల ముందుకు రాబోతున్నట్లుగా తెలిసింది. ఈ ప్రాజెక్టును ప్రముఖ దర్శకుడు గౌతమ్ మీనన్ నిర్మాణ బాధ్యతలను చేపట్టనున్నారని సమాచారం. మరి త్వరలోనే అన్ని వివరాలను అధికారికంగా ప్రకటించనున్నారు.