పాపం.. రకూల్ కి అన్యాయం చేస్తున్నారా?

Posted: 04/16/2015 11:03 AM IST

‘శ్రీమంతుడు’ చిత్రం తర్వాత మహేష్ బాబు హీరోగా శ్రీకాంత్ అడ్డాల దర్శకత్వంలో ‘బ్రహ్మోత్సవం’ చిత్రం తెరకెక్కనున్న విషయం తెలిసిందే. వీరి కాంబినేషన్లో ఇప్పటికే ‘సీతమ్మ వాకిట్లో సిరిమల్లె చెట్టు’ వంటి బ్లాక్ బస్టర్ హిట్ చిత్రం వచ్చిన విషయం తెలిసిందే. మరోసారి ‘బ్రహ్మోత్సవం’ సినిమాతో హిట్ కొట్టడానికి సిద్ధమవుతున్నారు.

భారీ బడ్జెట్ చిత్రాల నిర్మాణ సంస్థ పివిపి సినిమాస్ బ్యానర్ పై ప్రముఖ నిర్మాత ప్రసాద్.వి.పోట్లూరి ఈ చిత్రాన్ని నిర్మించనున్నారు. అయితే ఈ చిత్రంలో ముగ్గురు హీరోయిన్లు వుండనున్నారని సమాచారం. ఇందులో మొదటి హీరోయిన్ గా రకూల్ ప్రీత్ సింగ్ ను ఎంపిక చేసారంటూ వార్తలొచ్చిన విషయం తెలిసిందే.

అయితే తాజా సమాచారం ప్రకారం.. ఈ సినిమాలో మొదటి హీరోయిన్ గా రకూల్ కు బదులుగా సమంతను తీసుకునే ప్రయత్నంలో చిత్ర యూనిట్ వున్నట్లుగా తెలిసింది. మహేష్, సమంతల కాంబినేషన్లో ఇప్పటికే ‘దూకుడు’, ‘సీతమ్మ వాకిట్లో సిరిమల్లె చెట్టు’ వంటి హిట్ చిత్రాలొచ్చాయి. కాబట్టి.. ముచ్చటగా మూడోసారి కూడా వీరి జంట బాగుంటుందని చిత్ర యూనిట్ భావిస్తున్నారట.

మహేష్ కూడా సమంతను ఎంపిక చేస్తున్నట్లుగా సమాచారం. అయితే ఈ విషయంపై త్వరలోనే అధికారిక ప్రకటన వెలువడనుంది. ప్రస్తుతం సమంత నటించిన ‘సన్నాఫ్ సత్యమూర్తి’ చిత్రం ఇటీవలే విడుదలై భారీ కలెక్షన్లతో దూసుకుపోతుంది. అలాగే మహేష్ నటిస్తున్న ‘శ్రీమంతుడు’ చిత్రం త్వరలోనే ప్రేక్షకుల ముందుకు రానుంది.