నాగార్జున మైత్రి రీమేక్ లో శ్రీకాంత్ తనయుడు

Posted: 04/11/2015 11:48 AM IST

కన్నడంలో విజయం సాధించిన ‘మైత్రి’ చిత్రాన్ని తెలుగులోకి రీమేక్ చేయబోతున్నారని గతకొద్ది రోజులుగా వార్తలొస్తున్న విషయం తెలిసిందే. మలయాళ సూపర్ స్టార్ మోహన్ లాల్, మరియు కన్నడ పవర్ స్టార్ పునీత్ రాజ్ కుమార్ ప్రధాన పాత్రలలో నటించిన ‘మైత్రి’ సినిమా ఇటీవలే విడుదలై మంచి విజయం సాధించింది.

ఈ చిత్రాన్ని తెలుగులో రీమేక్ చేయాలని నిర్మాత ఎన్.ఎస్.రాజ్ కుమార్ ప్రయత్నిస్తున్నారు. ఇందులో నాగార్జున నటించబోతున్నాడని వార్తలొచ్చాయి. నాగార్జున కోసం ప్రత్యేకంగా స్పెషల్ షో ను ఏర్పాటు చేసారు. ‘మైత్రి’ చూసిన తర్వాత చిత్ర యూనిట్ ను అభినందించారు నాగార్జున. కానీ ఈ సినిమా రీమేక్ గురించి ఎలాంటి వివరాలు తెలియజేయలేదు.

అయితే తాజాగా ఈ ప్రాజెక్టుకు నాగార్జున గ్రీన్ సిగ్నల్ ఇచ్చినట్లుగా తెలిసింది. నాగార్జున స్నేహితుడైన జి.కె. ఈ చిత్రాన్ని తెరకెక్కించనున్నాడని సమాచారం. ఇందులోని ఓ కుర్రాడి పాత్ర కోసం హీరో శ్రీకాంత్ తనయుడిని ఎంపిక చేసినట్లుగా తెలిసింది. కన్నడంలో మోహన్ లాల్ చేసిన పాత్రలో నాగార్జున నటిస్తాడేమోనని అందరూ అనుకున్నారు. కానీ తాజా సమాచారం ప్రకారం... పునీత్ రాజ్ కుమార్ పాత్రలో నాగార్జున నటించనున్నాడని తెలిసింది. మరి మోహన్ లాల్ పాత్రలో ఏ అగ్ర నటుడు నటించనున్నాడో త్వరలోనే తెలియనుంది.

ఈ చిత్ర రీమేక్ కు సంబంధించిన అన్ని వివరాలు త్వరలోనే అధికారికంగా ప్రకటించనున్నారు. నాగార్జున ప్రస్తుతం PVP బ్యానర్లో తెరకెక్కుతున్న భారీ మల్టీస్టారర్ చిత్రంలో నటిస్తున్నాడు. అలాగే ‘సొగ్గాడే చిన్నినాయన’ చిత్రాల్లో నటిస్తున్నాడు. ‘సొగ్గాడే చిన్నినాయన’ చిత్రం విడుదలకు సిద్ధమవుతుంది. త్వరలోనే ప్రేక్షకుల ముందుకు రానుంది.