సినిమాల్లో ఎంట్రీ ఇవ్వనున్న బుల్లిరోజా..?

Posted: 03/11/2015 02:47 PM IST

సినిమాల్లో ఎంట్రీ ఇవ్వనున్న ‘బుల్లిరోజా’ ఎవరా అని సందేహంలో మునిగిపోయారా..! ఆ అమ్మాయి మరెవరో కాదు.. నటి, నగరి వైకాపా ఎమ్మెల్యే రోజా కుమార్తె అన్షు మాళిక. ఇప్పటికే ఈ అమ్మాయి బుల్లితెరపై బాలనటిగా మంచి గుర్తింపు సాధించింది. ఇక త్వరలోనే ఈమె వెండితెరపై రానున్నట్లు సంకేతాలు వెలువడుతున్నాయి.

ఇటీవల మహిళా దినోత్సవాన్ని పురస్కరించుకుని రోజా తన కుమార్తె అన్షు మాళికతో కలిసి వున్న ఫోటోలు ప్రముఖ దినపత్రికల్లో, మీడియాలో దర్శనమిచ్చాయి. ఆ ఫోటోలు అందరినీ విశేషంగా ఆకట్టుకున్నాయి. ఆ ఫోటోలను వీక్షించిన కొందరు దర్శకనిర్మాతలు.. 12 ఏళ్ల అన్షు మాళికను సినిమాల్లో నటించపచేయడానికి ప్రయత్నాలు మొదలుపెట్టారట! ఈ నేపథ్యంలోనే కొందరు దర్శకనిర్మాతలు రోజాను సంప్రదించినట్లు తెలిసింది. ఈ క్రమంలోనే రోజా తన కుమార్తెను బాలనటిగా వెండితెరపై పరిచయం చేసేందుకు గ్రీన్ సిగ్నల్ ఇచ్చేసిందని అంటున్నారు. మరి.. ఈ వార్తలు నిజమో కాదో తెలియాలంటే మరికొన్ని రోజుల వరకు ఆగాల్సిందే!

ఇదిలావుండగా.. నటి రోజా గురించి ప్రత్యేకంగా చెప్పుకోవాల్సిన అవసరం లేదు. 90వ దశకంలో తమిళం, తెలుగు భాషల్లో ప్రముఖ కథానాయికగా పేరుగాంచింది. ఈమె నటిగా మంచి ఫామ్‌లో ఉండగానే తనను తమిళ తెరకు పరిచయం చేసిన ప్రముఖ దర్శకుడు ఆర్‌కె సెల్వమణిని ప్రేమించి పెళ్లి చేసుకుంది. ఆ తరువాత రాజకీయ రంగప్రవేశం చేసి, గత శాసనసభ ఎన్నికల్లో వైఎస్‌ఆర్ కాంగ్రెస్ పార్టీ తరపున నగరి నియోజకవర్గం నుంచి పోటీ చేసి గెలుపొందింది.