ఉగాది కానుకగా జమీందార్ ఫస్ట్ లుక్

Posted: 02/23/2015 05:14 PM IST

మహేష్ హీరోగా కొరటాల శివ దర్శకత్వంలో ఓ చిత్రం రూపొందుతున్న విషయం తెలిసిందే. మైత్రీ మూవీస్ సంస్థ ఈ చిత్రాన్ని నిర్మిస్తున్నారు. శృతిహాసన్ హీరోయిన్ గా నటిస్తున్న ఈ చిత్రంలో జగపతిబాబు, రాజేంద్రప్రసాద్ లు కీలక పాత్రలలో నటిస్తున్నారు. ఫ్యామిలీ, యాక్షన్ ఎంటర్ టైనర్ గా రూపొందుతున్న ఈ సినిమాకు దేవిశ్రీప్రసాద్ సంగీతం అందిస్తున్నాడు.

ఈ చిత్రానికి గతకొద్ది కాలంగా పలు రకాల టైటిల్స్ వినిపిస్తున్నాయి. ‘పరాక్రమ’, ‘మగాడు’, ‘మా అక్క బంగారం’ అనే టైటిల్స్ అనుకుంటున్నట్లుగా గతంలో వార్తలొచ్చాయి. కానీ ఆ టైటిల్స్ ఏవి కాదని దర్శకుడు కొట్టిపారేసారు.

ఈ మధ్య ‘శ్రీమంతుడు’ అనే టైటిల్ దాదాపు ఖరారు అయ్యిందని, అధికారికంగా ప్రకటించడమే ఆలస్యమంటూ వార్తలొచ్చాయి. కానీ ‘శ్రీమంతుడు’ టైటిల్ చాలా ఓల్డ్ గా అనిపిస్తోందని, అందుకే ‘జమీందార్’ అనే టైటిల్ పెడితే బాగుంటుందనే వుద్దేశ్యంతో చిత్ర యూనిట్ అనుకుంటుందట. మరి ఇందులో ఏ టైటిల్ ను అధికారికంగా ఖరారు చేయనున్నారో త్వరలోనే తెలియనుంది.

ప్రస్తుతం ఈ చిత్ర షూటింగ్ పొల్లాచ్చి పరిసర ప్రాంతాల్లో శరవేగంగా జరుగుతోంది. ఈ చిత్ర ఫస్ట్ లుక్ ను మార్చి 21న ఉగాది కానుకగా విడుదల చేయడానికి సన్నాహాలు చేస్తున్నారు. త్వరలోనే అధికారికంగా ప్రకటించనున్నారు.