బాహుబలికి ‘రిలీజ్’ కష్టాలు.. మళ్లీ వాయిదా!

Posted: 02/23/2015 05:20 PM IST

Bahubali release date issue rajamouli prabhas rana daggubati anushka shetty tamannah

దర్శకధీరుడు రాజమౌళి ఎంతో ప్రతిష్టాత్మకంగా తెరకెక్కిస్తున్న ‘బాహుబలి’ చిత్రానికి విడుదల సమస్యలు ఎదురైనట్లు తెలుస్తోంది. అందుకే.. ముందుగా అనుకున్న తేదీకి కాకుండా ఈ మూవీ రిలీజ్ డేట్ ను వాయిదా వేసినట్లు ఫిలింనగర్ వర్గాల్లో టాక్ వినిపిస్తోంది. తాజాగా ఇండస్ట్రీవర్గాల నుంచి అందుతున్న సమాచారం ప్రకారం.. ఈ మూవీని మే నెలలో విడుదల చేయడానికి సన్నాహాలు చేస్తున్నారని టాక్ వస్తోంది.

మొదటగా ఈ చిత్రాన్ని ఏప్రిల్ 17వ తేదీన విడుదల చేస్తున్నట్లుగా ఇదివరకే చిత్రబృందం ప్రకటించింది. కానీ.. పోస్ట్ ప్రొడక్షన్ పనులు ఆలస్యంగా జరుగుతున్న నేపథ్యంలో రిలీజ్ డేట్ ని వాయిదా వేసినట్లు వార్తలొస్తున్నాయి. అంతేకాదు.. ఈ మూవీలోని చివరి పాట చిత్రీకరణ రామోజీ ఫిల్మ్ సిటీలో జరుగుతోంది. నిజానికి ఈ చిత్రం షూటింగ్ డిసెంబర్ లోనే పూర్తి కావాల్సి వుండేది కానీ.. ప్యాచ్ వర్క్ వుండటం వల్ల షూటింగ్ ఆలస్యమైంది. అందుకే.. ఈ మూవీని ఏప్రిల్ 17వ తేదీన విడుదల చేయడానికి సాధ్యపడదని యూనిట్ వర్గాలు చెబుతున్నాయి.

మరోవైపు ఈ చిత్రానికి హాలీవుడ్ కు చెందిన సాంకేతిక నిపుణులతో గ్రాఫిక్స్ వర్క్స్ సమకూర్చుతున్న నేపథ్యంలో ప్రొడక్షన్ పనులు ఆలస్యమవుతున్నట్లు తెలిసింది. దీంతో.. ఈ మూవీ షూటింగ్, ఇంకా ప్యాచ్ వర్క్ ను గమనిస్తుంటే.. మూవీ రిలీజ్ ఏప్రిల్ లో కాకుండా మే నెలలో వాయిదా పడుతుందని అంటున్నారు. ఒకవేళ ప్రొడక్షన్ పనులు ఆలస్యమైతే.. జూన్ మొదటి వారంలో విడుదల తేదీ వాయిదా పడే సూచనలున్నాయని యూనిట్ వర్గాలవారు అంటున్నారు. ఈ మూవీ విడుదల తేదీని త్వరలోనే అధికారికంగా వెల్లడించనున్నారని సమాచారం! ఏదైతేనేం.. మొత్తానికి ‘బాహుబలి’ చిత్రానికి కూడా రిలీజ్ కష్టాలు తప్పడం లేదన్నమాట!

150 కోట్ల భారీ బడ్జెట్ తో రూపొందుతున్న ఈ ‘బాహుబలి’లో ప్రభాస్, రానా, అనుష్క, తమన్నాలు ప్రధాన పాత్రల్లో నటిస్తున్న విషయం తెలిసిందే! ఎం.ఎం.కీరవాణి సంగీతం సమకూరుస్తున్న ఈ చిత్రాన్ని ఆర్కా మీడియా వర్క్స్ నిర్మిస్తున్నారు.