ఈమెలాగూ కుమారి కాదు.. ఆమైనా అవుతుందా...?

Posted: 12/23/2014 11:38 AM IST

Sukumar movie kumari 21f heroine changed

సినిమా ఇండస్ర్టీలో ఎప్పుడు ఏ హీరోయిన్ కు ఛాన్స్ వస్తుందో.., ఎవరికి ఉన్న అవకాశం పోతుందో ఊహించలేము. సినిమాలో సెలక్ట్ అయి షూటింగ్ మొదలు పెట్టిన తర్వాత కూడా హీరోయిన్ ను మార్చేయవచ్చు. అంతా డైరెక్టర్, నిర్మాత చేతుల్లో ఉంటుంది. తాజాగా ‘కుమారి 21ఎఫ్’ సినిమాలో కూడా హీరోయిన్ మారిందని టాక్ విన్పిస్తోంది. ముందుగా ఈ సినిమాకు షీనా బజాజ్ ను ఎంపిక చేసినట్లు మూవీ యూనిట్ తెలిపింది. దీంతో అమ్మడి పంట పండినట్లే అనుకున్నారంతా.., అంతలోనే అదృష్టం అడ్డం తిరిగింది. అవకాశం మరొకరిని వరించింది.

ప్రస్తుతం ఫిలింనగర్ లో విన్పిస్తున్న టాక్ ప్రకారం.., షీనా స్థానంలో హేబా పాటిల్ ఎంపికయినట్లు గుసగుసలు విన్పిస్తున్నాయి. ‘అలా ఎలా...?’ సినిమాలో నటించిన ఈ భామ అభినయంతో బాగా ఆకట్టుకుంది. దీంతో షీనాను వదిలేసి హేబాను లాగేసుకున్నారని తెలుస్తోంది. వచ్చిన ఛాన్స్ పోగొట్టుకుని బజాజ్ బాధపడుతుంటే.. అనుకోని అదృష్టంలా ఈ ఆఫర్ రావటం పట్ల హేబా సంతోషం వ్యక్తం చేస్తోంది. ఈ మూవీ తన కెరీర్ కు బాగా ఉపయోగపడుతుందని ఈ భామ బాగా నమ్ముతోంది.

‘ఆర్య’, ‘100%లవ్’, ‘1 నేనొక్కడినే’ వంటి విభిన్నమైన సినిమాలు అందించి ప్రేక్షకుల అభిమానం పొందిన డైరెక్టర్ సుకుమార్ నిర్మాతగా మారి చేపడుతున్న తొలి మూవీ ‘కుమారి 21ఎఫ్’. త్వరలో ఫుల్ షెడ్యూల్ షూటింగ్ జరుపుకునే ఈ సినిమాలో హేబా అయినా కుదురుగా ఉంటుందా లేక.., మార్చేస్తారా అనేది చూడాలి.

కార్తిక్