హీరోయిన్లకు పెరుగుతున్న హృదయ వైశాల్యం!

Posted: 04/07/2014 03:25 PM IST

కొత్తగా వస్తున్న హీరోయిన్ల హృదయ వైశాల్యానికి హద్దు లేదని అర్థమౌతోంది.  2 స్టేట్స్ చిత్రంలో సహజత్వానికి చేరువలోకి వెళ్ళి దర్శకుని అభిలాషలకు అనువుగా నటించిన ఆలియా భట్ స్వామి కార్యం స్వకార్యం అన్నట్లుగా హీరో అర్జున్ కపూర్ తో కేమెరా ముందు సన్నిహితంగా నటించటమే కాకుండా సినిమా ప్రొమోలలో కూడా ఒకరికొకరైన జంటగా వ్యవహరించారు. 

అయితే గుండె చిన్నదైనా గూడు పెద్దదే అన్నట్లుగా రణబీర్ కపూర్ అంటే తనకి చచ్చేంత ప్రేమని ఆలియా భట్ మీడియా ముందు చెప్పుకొచ్చింది.  అంతేనా, తనది ఒక వైపు నుంచి మాత్రమే పెల్లుబుకుతున్న ప్రైమైనా, పెళ్ళి చేసుకోవటం జరిగితే మాత్రం అతనితోనే అంటోంది!  "ఈ విషయాన్ని మరి అతనికి చెప్పి, అతని తల్లిదండ్రుల దగ్గరకు సాంప్రదాయబద్ధంగా తీసుకెళ్ళకపోయారా?" అని మీడియా ప్రతినిధులు అడిగిన దానికి, "ఈ కాలంలో వార్తలు అడవిలో నిప్పులా చకచక వ్యాపిస్తుంటాయి కాబట్టి అందరికీ అన్ని విషయాలు చాలా త్వరగా తెలిసిపోతుంటాయి! ఇప్పుడు నేను చెప్పింది కూడా టివిలోకి వార్తలా వచ్చేస్తుంది ఈ కాలంలో అందరూ టివిలు చూస్తునేవుంటారు కాబట్టి ప్రత్యేకంగా వెళ్ళి ఎవరికీ ఏమీ చెప్పనక్కర్లేదు" అని అందామె. 

ఇక రణబీర్ కపూర్ విషయానికి వస్తే, విపరీతమైన ఫ్యాన్స ఉన్న రణబీర్ తలమునకలుగా దేశంలో అత్యంత శృంగారభరితమైన విగ్రహంగా మార్కులు కొట్టేసిన కత్రినా కైఫ్ తో డేటింగ్ చేస్తూ అడ్డంగా దొరికిపోతున్నాడు.  మరి టివిలో అది కూడా కనిపించేవుండాలిగా అందరికీ.  అయినా ఆలియా భట్ కి అది తెలియనట్లుగానే ప్రవర్తిస్తోంది. 

ఇక కత్రినా కైఫ్ కూడా నోట్లో వేలు పెడితే కొరకటం తెలియని అమాయకురాలు అమ్మాయేమీ కాదు.  కండల కుర్రవాడు సల్మాన్ కి మంచి ఆడ స్నేహితురాలిగా మంచి పేరు సంపాదించుకున్న జాణామణే.! 

అందువలన సినిమా నటీనటులకు ఇరుకు గుండె ఏ మాత్రం లేదని, వారి హృదయంలో ఎంతో మందికి చోటుంటుందని, పుష్పక విమానంలో లాగా ఎంతమంది ప్రవేశించినా మరొకరికి చోటుంటుందని ఈ విధంగా మనం తెలుసుకోవచ్చు!

-శ్రీజ