మెగా అభిమానుల సందిగ్ధావస్థ

Posted: 04/02/2014 10:45 AM IST

మా చిన్నప్పుడు మా పిన్నివాళ్ళ పిల్లలతో మేము చాలా స్నేహంగా ఉండేవాళ్ళం.  అయితే మా అమ్మ, పిన్ని మధ్య గొడవలు వస్తుండేవి.  అప్పుడు మేము మాట్లాడుకోవాలా వద్దా అన్నది తెలియక సందిగ్ధంలో ఉండిపోయేవాళ్ళం.  బయట స్కూల్లో కలిసినప్పుడు మాట్లాడుకునే వాళ్ళం.  అల్లంత దూరంలో ఇల్లు కనపడగానే విడిపోయి ఒకళ్ళనొకళ్లు గుర్తుపట్టనట్టుగా ఉండేవాళ్ళం. 

చిరంజీవి, పవన్ కళ్యాణ్ ల సినీ అభిమానుల పరిస్థితి కూడా, కొందరు పేరు పైకి చెప్పటం ఇష్టం లేని అభిమానులు చెప్పినదాని ప్రకారం, అలాగే తయారైనట్లుగా కనిపిస్తోంది.  ఎందుకంటే వాళ్ళ అభిమానం సినిమాల వరకే పరిమితమవకుండా రాజకీయరంగంలోకి కూడా అడుగుపెట్టటం జరిగింది.   

అనంతపూర్ లో కాంగ్రెస్ బస్ యాత్రలో మాట్లాడుతున్న చిరంజీవి ఉపన్యాసానికి అడ్డు వచ్చి పవన్ కళ్యాణ్ గురించి మాట్లాడటం ఆయనకి కోపాన్ని తెప్పించింది.  కాంగ్రెస్ పార్టీ రాష్ట్ర అధ్యక్షుడు రఘువీరా సింగ్ మంగళవారం నాడు చిరంజీవి అభిమానులందరికీ చిరంజీవి సమక్షంలోనే పార్టీ సభ్యత్వం తీసుకోమని, నాయకులుగా గుర్తింపుని పొందమని, కాంగ్రెస్ పార్టీ తరఫున ప్రజాప్రాతినిధ్యానికి పోటీ చెయ్యమని పిలుపునిచ్చారు. 

అలాగే పవన్ కళ్యాణ్ రాసిన ఇజం పుస్తకం గురించి వ్యాఖ్యానిస్తూ అందులో మానవీయ దృక్పథం లేదని చిరంజీవి అన్నట్లుగానూ, అందుకు సమాధానంగా, రామాయణాన్ని కూడా విమర్శించేవారుంటారు, ఎవరి అవగాహన వారిది అని పవన్ కళ్యాణ్ అన్నట్లుగా ఒక టివి ఛానెల్ ప్రసారం చేసింది.  ప్రశ్నించటానికే పుట్టిన జనసేన పార్టీ తరఫున అవసరమైతే చిరంజీవిని కూడా ప్రశ్నించటం జరుగుతుందని పవన్ కళ్యాణ్ అన్నారని కూడా ఆ ఛానెల్ తెలియజేసింది.

ఇది నిజంగా మెగా అభిమానులకు పరీక్షే.  ఒకరిని అభిమానించటమంటే మరొకరిని ద్వేషించటం కాదు కాబట్టి పవన్ కళ్యాణ్ సినిమాలను అభిమానిస్తాం కాని ఆయన రాజకీయాలను కాదని చిరంజీవి అభిమాన సంఘం లోగడ ప్రకటించటం జరిగింది. 

కానీ ఆ పరిస్థితి కూడా మారిపోతూ కనిపిస్తోంది.  ఎందుకంటే చిరంజీవి కుటుంబ సభ్యులంతా చిరంజీవికే మద్దతును ప్రకటిస్తున్నారు.  దానితో పవన్ ఒంటరైపోయాడనే భావన కలుగుతోంది.  అందువలన అభిమాన సంఘాలలో చీలికలు కూడా ముందు సిద్ధాంత పరంగా ఉన్నట్లుగా ఉన్నా, మరుగునపడివున్నా, అవి ఇప్పుడు బాహాటంగా విభజనకు చోటుచేసుకుంటున్నాయి. 

కానీ గుండెల్లో గూడుకట్టుకున్న అభిమానం చేత్తో తీసిపారేసేది కాదు కాబట్టి, వ్యాపార వాణిజ్య రాజకీయ రంగాలకు అతీతం కాబట్టి, ఇద్దరి మీదా అభిమానం ఉన్నవాళ్ళ మనసులు మాత్రం ముక్కలౌతున్నాయి.  రెండుగా కాదు- చిన్నచిన్న ముక్కలుగా!

-శ్రీజ