దర్శకుడి నాలుకకి కోటి రూపాయల గిరాకీ

Posted: 11/23/2016 08:40 AM IST

చిత్రమైన టైటిల్ ను ఎంచుకున్నాడని బాలీవుడ్ యాక్షన్ హీరో అక్షయ్ కుమార్ పై ప్రశంసలు కురిపించి కొద్ది రోజులు గడవక ముందే కొత్త చిత్రం టాయ్ లెట్-ఏక్ ప్రేమ్ కథా ఇప్పుడు వివాదాల్లోకి ఎక్కింది. ఓ సాధువు టైటిల్ పై మండిపడటమే కాదు, చిత్ర దర్శకుడి నాలుక కోసి తెచ్చి ఇచ్చినవారికి కోటి రూపాయల నజరానా ప్రకటించాడు కూడా. విషయం ఏంటంటే.. ఈ చిత్ర షూటింగ్ షూటింగ్ ఉత్తర్‌ప్రదేశ్‌లోని నంద్‌గావ్‌, బర్సానా గ్రామాల్లో కొన‌సాగుతోంది. ఇరు గ్రామాల ప్రజల భావోద్వేగాలను కించ‌ప‌రుస్తున్నార‌ని, సాంప్రదాయాన్ని దెబ్బ కొడుతున్నారంటూ మ‌ధుర‌కు చెందిన‌ బెహారీ దాస్‌ మహరాజ్‌ అనే సాధువు మండిప‌డ్డారు.

ఈ మేరకు సోమవారం బర్సానా గ్రామంలో సాధువులతో పంచాయితీ మీటింగ్ పెట్టి టైటిల్ మార్చాల్సిందేనని పట్టుబడ్డాడు. సినిమాకి ఇటువంటి టైటిల్ పెట్టిన ద‌ర్శ‌కుడి నాలుక కోసి తెచ్చిన వారికి కోటి రూపాయ‌లు ఇస్తాన‌ని ఆయన ప్రకటించారు. కృష్ణుడు-రాధా సెంటిమెంట్ లతో నంద్‌గావ్‌ గ్రామ ప్రజలు, బర్సానా గ్రామా ప్ర‌జ‌లకి మ‌ధ్య పెళ్లి సంబంధాలు కుద‌ర‌వ‌ని, అటువంటిది సినిమాల్లో ఈ రెండు గ్రామాలకు చెందిన యువ‌కుడు, యువ‌తి మధ్య ప్రేమ ఉన్న‌ట్లుగా చూపిస్తున్నారని ఆయన ఆరోపించారు.

మరో సాధువువేమో దేవుళ్లు పుట్టిన ఊళ్లను ఇలా వాడుకోవటం సరికాదని ఆగ్రహాం వ్యక్తం చేశాడు. ఇంకో సాధువు చిత్ర పేరును టాయ్ లెట్- ఏ స్వచ్ఛ భారత్ అభియాన్ అని మార్చుకుంటే కాస్త సందేశాత్మకంగా ఉంటుందని సలహా ఇఛ్చాడు. అయితే వివాదంపై స్పందించిన స‌ద‌రు సినిమా దర్శకుడు నరేన్‌ సింగ్‌.. తమ సినిమాలో అంద‌రూ అనుకుంటున్న‌ట్లు అక్క‌డి ప్ర‌జ‌ల‌ను కించ‌ప‌రిచే స‌న్నివేశాలేమీ ఉండ‌వ‌ని చెప్పారు. అస‌లు ఈ సినిమాలో ఈ రెండు గ్రామాల‌ పేర్లు చూపించడం లేదని చెప్పారు. చిత్రంలో ఓ మహిళ సాధికారత గురించి ఉంటుంద‌ని పేర్కొన్నారు.