ఆహార సరఫరా దిగ్గజ సంస్థ జొమాటోలో ఊబర్ ఈట్స్ విలీనం..

Posted: 01/21/2020 07:40 PM IST

Uber eats out of food apps race as zomato acquires the app

భారతీయ ఆహార సరఫరా దిగ్గజం జొమాటో దేశీయ మార్కెట్లో మరింతగా వేళ్లూనుకునే ప్రయత్నాలు విజయవంతం అయ్యాయి. అమెరికన్‌ ఆన్ లైన్‌ ఆహార సంస్థ ఉబెర్‌ ఈట్స్ ను జోమాటో తనలో విలీనం చేసుకుంది. ఈ మేరకు ఆ రెండు సంస్థలు దాదాపు రూ.2500 కోట్ల విలువైన వ్యాపార ఒప్పందం చేసుకొన్నాయి. ఈ ఒప్పందంలో భాగంగా ఉబెర్ కు జొమాటోలో 9.9శాతం వాటా లభించింది. అంతేకాకుండా ఉబెర్‌ ఈట్స్‌ వినియోగదారులందరినీ జొమాటోకు బదలాయించారు.

అయితే ఉబెర్‌ ఈట్స్‌ ఉద్యోగులను మాత్రం జొమాటో స్వీకరించదట. భారత్‌లో పనిచేస్తున్న 100 మంది ఎగ్జిక్యూటివ్‌లకు పదవీ విరమణ ఇవ్వడంగానీ, లేదా వేరే విభాగాలకు మళ్లిస్తారు. ‘‘భారత్‌లో మా ఆహార సామ్రాజ్యాన్ని స్థాపించి దానిని 500 పైగా నగరాలకు విస్తరించినందుకు గర్విస్తున్నాం. మా తాజా కొనుగోలుతో ఆహార సరఫరా రంగంలో మా స్థానం మరింత బలోపేతం కానుంది’’ అని జొమాటో సీఈవో దీపిందర్‌ గోయల్‌ ప్రకటించారు.

మరోపక్క ‘‘2017లో మేము భారత అన్‌లైన్‌ ఆహార రంగంలో ప్రవేశించాము. జొమాటోలో విలీనంతో ఈ రోజు మా ప్రయాణం ఒక కొత్త మలుపు తీసుకుంది. దీంతో ఇక భారత్ లో ఉబెర్‌ ఈట్స్‌ సేవలు లభ్యం కావు. మా వినియోగదారులకు రానున్న రోజుల్లో చక్కటి ఆహారంతో మరింత సంతోషం లభించాలని కోరుకుంటున్నాం’’ అని తన ఉబెర్‌ తన అధికారిక ట్విటర్‌ ఖాతాలో ప్రకటించింది. దీంతో ఉబెర్‌ ఈట్స్‌ ప్రాబల్యం ఎక్కువగా ఉన్న మధ్యప్రదేశ్‌, తమిళనాడు, కేరళ తదితర ప్రాంతాలలో జొమాటోకు గట్టి పట్టు దక్కనుంది.