Posted: 11/02/2012 08:29 PM IST

సాఫ్ట్‌వేర్ సేవల దిగ్గజం విప్రో... ఐటీయేతర బిజినెస్‌లను విడదీసి ఒక ప్రత్యేక కంపెనీగా ఏర్పాటు చేసేందుకు నిర్ణయించింది. తద్వారా సాఫ్ట్‌వేర్ సేవల బిజినెస్‌పై పూర్తిస్థాయిలో దృష్టి సారించనుంది. ఇందుకు విప్రో ఎంటర్‌ప్రైజెస్ పేరుతో కొత్తగా అన్‌లిస్టెడ్ సంస్థను ఏర్పాటు చేయనుంది. దీనిలో భాగంగా కన్సూమర్ కేర్ లైటింగ్(ఫర్నిచర్ విభాగం కూడా), ఇన్‌ఫ్రాస్ట్రక్చర్ ఇంజనీరింగ్ (హైడ్రాలిక్స్, వాటర్ బిజినెస్‌లు), మెడికల్ డయాగ్నస్టిక్ ఉత్పత్తులు, సర్వీసుల బిజినెస్‌లను విప్రో ఎంటర్‌ప్రైజెస్ కింద ఏర్పాటు చేయనుంది. ఈ వార్తల నేపథ్యంలో విప్రో షేరు ఒక దశలో 7% ఎగసింది. అయితే చివరికి 3% లాభంతో (బీఎస్‌ఈ) రూ. 361 వద్ద ముగిసింది. కాగా, శుక్రవారం (2న) సెప్టెంబర్ క్వార్టర్ ఫలితాలను విప్రో వెల్లడించనుంది.

కంపెనీని రెండుగా విడదీయడం వల్ల లాభాల మార్జిన్లు మెరుగుపడతాయని విప్రో సీఎఫ్‌వో సురేష్ సేనాపతి అభిప్రాయపడ్డారు. మొత్తంగా విప్రో మార్జిన్లతో పోలిస్తే ఐటీ బిజినెస్ లాభదాయకత గరిష్ట స్థాయిలో ఉంటుందని తెలిపారు. ఐటీ సేవల కంపెనీగా విప్రో లిస్టింగ్ కొనసాగుతుందని, లిస్టింగ్ చేసేటంత పెద్ద వ్యాపారాలు కాకపోవడంతో విప్రో ఎంటర్‌ప్రైజెస్ మాత్రం అన్‌లిస్టెడ్ కంపెనీగా వ్యవహరిస్తుందని చెప్పారు.

వ్యాపార విభజన నేపథ్యంలో యాజమాన్య నిర్వహణలో మార్పులుండ వని సేనాపతి చెప్పారు. విప్రో బోర్డు యథాతథంగా కొనసాగుతుందని పేర్కొన్నారు. విప్రో, విప్రో ఎంటర్‌ప్రైజెస్ నిర్వహణలో ఎలాంటి మార్పులుండవని తెలిపారు. అజీం ప్రేమ్‌జీ విప్రోకు ఎగ్జిక్యూటివ్ చైర్మన్‌గానే బాధ్యతలు నిర్వర్తిస్తారని పేర్కొన్నారు. అయితే విప్రో ఎంటర్‌ప్రైజెస్‌కు ఆయన నాన్ ఎగ్జిక్యూటివ్ చైర్మన్‌గా వ్యవహరిస్తారని వెల్లడించారు. మొత్తం ఆదాయంలో 90% వాటాను ఆక్రమిస్తున్న ఐటీ సేవలపై మరింత దృష్టిపెట్టేందుకే వ్యాపార విభజనను చేపడుతున్నట్లు చెప్పారు.దీంతో కస్టమర్లు, టార్గెట్ కంపెనీలు, ఇన్వెస్టర్లకు తమ బిజినెస్‌పట్ల అవగాహన పెరుగుతుందని కంపెనీ సీఈవో(ఐటీ బిజినెస్) టీకే కురియన్ వ్యాఖ్యానించారు. వెరసి కంపెనీ పోటీతత్వం మెరుగుపడుతుందని చెప్పారు.